مسرحية المهابير المنظر الرابع

المنظر الرابع نفس ديكور المنظر الاول في داخل المقابر

عبده وحمو يقفان امام جثة محاسن

حمو احنا لمينا اكتر من اربع تلاف جنيه تمن الكفن وماجبنهاوش

عبده ربنا يخليهالنا سترتنا وبشبشتنا علي الأخر

حمو وماغرمتناش حاجه كام كيس ملح كل يوم وكام ازازة خل ..بس تفتكر يابا

حنقدر نخللها كام يوم

عبده مش عاوز افتكر ولو عليه عاوزها هنا علي طول

حمو بس البت نعمه كل يوم بتسألني انتوا مادفنتوش محاسن

عبده قلها دفناها...خلينا بس نفكر حنجيب فلوس منين تاني .

حمو ههههههههه ماتقلقش ..مظاهرات شغاله في كل حته

السواقين والعمال وامناء الشرطه والخير كتير.

عبده السواقين كمان دول مولعينها العربيه اللي شغاله من رمسيس لحد الوراق

مقسمه المسافه خمس مرات والعربيات اللي جايه هنا عاوزلك كل يوم

عشرين جنيه مواصلات.

حمو الناس اتسعرت ومحدش طايق التاني

عبده يابني مش احنا بس اللي خايبين احنا عندنا ضمير اكتر منهم احنا مابنشتغلش

ومابنلاقيش فلوس وهما مابيشتغلوش وبيقبضوا اول كل شهر وعاوزين زياده

الموظف المفروض بيشتغل تمن ساعات .

حمو اه من تمانيه لاربعه ...بيروحوا تسعه ويفطروا من تسعه لعشره

ويادوب شغل ساعتين لحد مايأذن الضهر وبعد كده يقولك تعالي بكره.

عبده بيتعبوا خالص ومن حقهم ياعيني زياده في الاجور

حمو يابا احنا شعب نتكلم اه ومانعملش حاجه وعاوزين كل حاجه.

عبده ياعيني عليك يامحروسه .........

حمو مش حننزلوا نلقطوا رزقنا...

عبده اه والنبي عشان الرقاصه وحشتني.

حمو يابا خف عليها .....دي كل ماتغمزلك ترمي عليها مية جنيه

وحتي مش عارف تمسك ايديها.

عبده وحياتك مسكت ايدي وقالتلي انت ساكن فين .

حمو وقلتلها ساكن في المقابر.

عبده لساني المنيل زلف وقولت ومن ساعتها بتغمز بس.

حمو طيب تعالي نقرا الفاتحه لمحاسن .

عبده خلي الفاتحه بعدين وبينا نلقط زقنا ونشوف تمن الكفن .


بلاك اوت