منتدى الفراعنة

منتدى أ/سمير حماية

المواضيع الأخيرة

» لوحة الشرف .......
الثلاثاء أغسطس 29, 2017 11:42 am من طرف سميرحمايه

» الأسد والثعلب
الثلاثاء أغسطس 22, 2017 8:51 pm من طرف سميرحمايه

» اكلي لحوم البشر
الإثنين أغسطس 21, 2017 3:58 am من طرف سميرحمايه

» خواطر ساميرية
الجمعة أغسطس 04, 2017 10:35 am من طرف سميرحمايه

» الحمار والثعلب قصة قصيرة
السبت يوليو 15, 2017 5:10 pm من طرف سميرحمايه

» طالوت ملكا..تأليف سمير حمايه..المشهد الاخير( المنظر الاول)
الإثنين يونيو 19, 2017 7:54 pm من طرف سميرحمايه

» ياقوتة.......
الأربعاء مايو 31, 2017 9:18 am من طرف سميرحمايه

»  مسرحية طالوت ملكا تأليف سمير حمايه المشهد الاول(المنظر الرابع والخامس)
السبت مايو 20, 2017 12:46 am من طرف سميرحمايه

»  مسرحية طالوت ملكا...تاليف سمير حمايه..المشهد الثاني(المنظر الاول)
السبت مايو 20, 2017 12:43 am من طرف سميرحمايه

التبادل الاعلاني


    المسرحيه الكوميديه ...ببساطه زمن عباطه..تأليف سميرحمايه

    شاطر

    سميرحمايه

    عدد المساهمات : 1009
    تاريخ التسجيل : 29/10/2010
    العمر : 48

    المسرحيه الكوميديه ...ببساطه زمن عباطه..تأليف سميرحمايه

    مُساهمة من طرف سميرحمايه في الجمعة مايو 06, 2011 7:18 pm




    اللوحه الأولي

    الديكور..حاره في الجانب الايمن محل جزارة عجلان ولافته بالاسم اعلي المحل..وفي الجهه المقابله قهوة حلبسه ومجموعه من المقاعد والمناضد امام القهوه..في الخلف نري لافتات عليها مكوجي السعاده وفواكه اولاد حارتنا...الوقت باكر والحركه بطيئه في الحاره وحنكش عامل المقهي يمسك بجردل ويرش مياه امام القهوه...ينتهي حنكش من رش المياه ويضع الجردل جانبا..


    حنكش ...يارب يافتاح ياعليم مايكنش النهارده زي امبارح

    ولا اول امبارح ولا اول اول امبارح..نفسي ياربي في
    يوم احس انه يوم جديد....اه ياحاره كل واحد ماسك فيها سناره.



    (يدخل جعلص الشحاذ)
    جعلص...يوم من يوم قريب والشمس اللي غابت مش حتغيب..

    حنكش..حايجي يوم جديد منين وانا باصتبح بالخلقه المعفنه دي
    كل يوم...(محدثا جعلص) والله ماجد ناحس الحاره غيرك
    ياجعلص..؟

    جعلص..(يقترب من حنكش)...انتوا حترموا بلاكم عليا.(ساخرا)
    الحاره ياابني منحوسه بيكم...اعملي كوباية شاي.؟

    حنكش...لسه الرماله ماسخنتش...

    جعلص...(مترجيا حنكش)...ياابني ياحبيبي خليني الحق اصطباحية
    الموظفين ولازم اعمر الطاسه بواحد شاي معتبر.

    حنكش..انت روح اعمل اصطباحيتك وتعالي.

    جعلص...ماينفعش لازم اعمر دماغي..عشان الموظف من دول
    ياخد الدعوه مني وبعدين يروح مطلع اللي في
    جيبه علي طول.

    حنكش..والنبي لو تقعد تعيلهم لحد الصبح..هما الموظفين لاقيين
    ياكلوا.

    جعلص..(ساخرا)...ده سر المهنه ياولد ياحنكش واعرف اخليهم
    يقبوا باللي في جيوبهم.

    حنكش..(متطفلا)...طيب قولي السر وانا اعمرلك الطاسه بواحد
    شاي تقيل ماتقدرش تشيله.

    جعلص..سر أيه...؟

    حنكش....سر الدعوه اللي تخلي الموظفين يطلعولك فلوس..؟
    حدخل اجيبلك كوباية الشاي عشان تقولي..
    (يدخل حنكش سريعا الي الداخل ويعود بكوب شاي
    ويناوله لجعلص.)
    وادي كوباية الشاي.

    جعلص...بص ياواد ياحنكش..انا ادخل علي الموظف من دول
    ولو لقيته مبوز ومكشر..؟

    حنكش...تسيبه وتمشي..؟

    جعلص لا..يابني اديله دعوة التكشير.

    حنكش...هو التكشير له دعوه..؟

    جعلص..كل حاجه وليها دعوتها.

    حنكش..وايه هي دعوة التكشير بقي..؟

    جعلص..اقوله ربنا يهدي عليك المدرسين.

    حنكش...ودي تخليهم يطلعولك فلوس.

    جعلص..ايوه ..ماهو المدرسين اللي بينكدوا عليهم اول كل
    شهر ياجاهل..ويخلصوا فلوسهم..اللي يقبضوه .المدرسين
    يلهفوه.

    حنكش...وبقيت الشهر يعيشوا ازاي وياكلوا ايه..؟

    جعلص...ياكلوا في بعضهم...

    حنكش ..وياكلوا بعض حاف كده من غير غموص..؟

    جعلص..لا فيه غموص..مستشفيات واقسام وحاجات زي كده
    (ينتهي من شرب كوب الشاي)

    حنكش...طيب دي دعوة التكشير وعرفناها والدعوه التانيه.؟

    جعلص..التانيه دعوة الفشاشه..؟

    حنكش..(ساخرا)..فشاشه..فشاشة ايه انت حتشتغلني.

    جعلص..واشتغلك ليه ياعبيط..الفشاشه يعني..لما الواحد كده
    ..يبقي وشه فشوش..؟

    حنكش..فشوش ايه...مش فاهم..؟

    جعلص...ياعم الفشوش..يعني اللي بقه سته في تسعه..

    حنكش...اها..يعني اللي شايفه بيضحك..

    جعلص...ايوه عليك نور...

    حنكش ...وده تدعيله بايه ياناصح..

    جعلص...اقوله...روح ياشيخ .ربنا مايوقفلك حسنه جيالك
    ولا ست ريحالك...

    حنكش...والله ما فاهم حاجه..؟

    جعلص...ولا حتفهم...الحسنه يا ولا يعني الفلوس اللي بتتحط
    ليه في الدرج من تحت الترابيزه..عشان الناس تخلص مصالحها
    اللي في ايديهم..دي اسمها الحسنه اللي جياله..؟

    حنكش...والست اللي ريحاله...؟

    جعلص...ماهو كل ماتكتر حسناته تزيد سيئاته..بير ويرمي في بحر

    حنكش...بحر..بحر ايه .؟

    جعلص ...بحر النسوان..
    حنكش...هما النسوان ليهم بحر..؟

    جعلص ...اه بحر كله دوامات وماتنفعش فيه عوامات..

    حنكش...طيب الواحد يعوم فيه ازاي..؟

    جعلص...مش حتعرف تعوم فيه..؟

    حنكش ...ليه بقي...؟

    جعلص...عشان بحرهم دايما بيجيب شد عضل.


    (يدخل فوزي وهو يجري نحو حنكش وممسكا فانله في يده)


    فوزي....خبيني والنبي ياحنكش..؟


    حنكش....اخبيك من ايه....فيه حكومه بتجري وراك..؟


    فوزي....لا ..مراتي هي اللي بتجري ورايا.


    حنكش..(ساخرا)....اخبيك من روايح...ها ها ها...انا عارف انا

    ايوم ده اسود ومش طالعاله شمس.

    فوزي....والنبي ابوس ايدك خبيني

    جعلص ..(مقتربا من فوزي).....وايه اللي في ايدك ده يافوزي..؟


    فوزي....دي فانله...؟


    جعلص.....فانلة ايه....؟



    فوزي....انا مسكت راجل في بيتي.


    حنكش.....وفين الراجل ده....؟


    فوزي....جري مني وهرب.....اول ما شافني اترعب م الخوف


    وقعد يلبس في هدومه وانا ابص له اخوفه...ونسي الفانله.


    جعلص....ومراتك فين....؟


    فوزي.....كانت زنقاني في الحيط لحد ما الراجل لبس هدومه

    ومشي.


    حنكش....وبعدين ياسبع البرمبه.


    فوزي.....هيه ماخدتش بالها ان الراجل نسي الفانله...خطفتها

    واجريت..

    جعلص.... وحتعمل ايه بالفانله..؟


    فوزي....حوديها لوكيل النيابه....قلي هاتلي دليل.


    (تدخل روايح)

    روايح...تعالي يااخر صبري....هات الفانله.


    فوزي....(يختبئ خلف حنكش)....والنبي انا في عرضك ياحنكش.


    حنكش....لا ياخويه ابعد عني..(يبعده)...لا في عرضي ولا في طولي.


    فوزي..(يجري محتميا في جعلص)...في عرضك انت ياجعلص


    احميني.

    جعلص...(يبعده)....يحميك ربنا ياحبيبي...دي لو سكعتني قلم حروح فيها.

    روايح..(تقترب منه وتنتزعه من خلف جعلص)...هات الفانله.


    فوزي...(خائفا ومستسلما)...خدي...بس بالراحه والنبي.


    روايح....قولي بقي واخد الفانله ورايح بيها علي فين..؟


    فوزي....ماكنتش رايح في حته...كنت بجري عشان احصل

    الراجل واديه الفانله.

    روايح..(بغضب)....حتقول الحقيقه ولا...؟

    حنكش....قولها انك كنت واخدها ورايح بيها لوكيل النيابه.


    فوزي...(مكذبا حنكش)....لا ماحصلش..الواد حنكش بيكدب.


    روايح...(محدثه حنكش)....هو اللي قلك يامنيل حيوديها

    لوكيل النيابه...؟


    حنكش...اه والله....قال كده قدامي انا وجعلص.

    جعلص....لا...انا ماليش فيه...لا سمعت ولا شوفت

    انا حوح اشوف رزقي.

    حنكش...(يمسك في جعلص)...انت حتروح فين ماتسيبنيش

    لوحدي مع المصيبه دي.

    جعلص....الست دي شرانيه ياحنكش وخليني اروح اشوف رزقي.

    حنكش....وتسيب حنكش حبيبك اللي كل يوم يديك كوباية شاي.


    روايح...(محدثه فوزي)....انت قلتله حتودي الفانله للنيابه..؟





    فوزي....انشاء الله اعدمك ماحصل.


    حنكش....ياعم قول...كده كده حتقول....وفر علي نفسك كام شلوت.


    فوزي....اه قلتله...؟


    روايح.....ورحت لوكيل النيابه امتي.


    فوزي...رحت امبارح.


    روايح....وقلت له ايه بقي....؟


    فوزي....قلت له ...فيه ناس غريبه بتدخل بيتي وانا مش


    موجود وبنتي جسمها لف واتدور وبقي جسم ست

    مش بت.

    روايح....وبعدين ياسبعي...؟


    فوزي....ولا قبلين.


    روايح....طيب انت شوفت حاجه بعنيك.


    حنكش...اه صح....انت شوفت حاجه بعنيك ..علي رأي


    المثل المتهم بريئ حتي تمسك فانلته.

    روايح...(تشخط في حنكش)....استني انت يامنيل..

    حنكش....حاضر ياست روايح.

    روايح...(محدثه فوزي)....رد عليا ..انت شوفت حاجه


    بعنيك.


    فوزي...لا...انا شوفت النهارده بس.

    روايح...شوفت ايه النهارده.


    فوزي....شوفت الراجل ملط.


    روايح ...ولبس هدومه....صح..

    فوزي.....اه....

    روايح....شوفت حاجه تانيه غير كده.

    فوزي....لا...الكدب خيبه....بس ابنك اللي كان

    بيشوف وقلي علي كل حاجه.

    روايح...وقلك ايه المفعوص ده..


    فوزي...قلي رجاله كتير بتدخل عندنا يابابا وواحد

    اسمه ابو سته...كل يوم بييجي عندنا وانا

    استخبيت تحت السرير وشوفت كل حاجه.

    جعلص...حد برضه يصدق عيل يافوزي.

    فوزي...الولا اللي بيقول انه شاف كل حاجه وهو

    تحت السرير.

    حنكش....هو فيه حد تحت السرير بيشوف.


    جعلص....صح ياواد ياحنكش...بيسمع بس...انت

    ظلمت روايح يافوزي.


    روايح.....مش كده برضه.

    حنكش....كده ونص..(محدثا فوزي بسخريه)...فرحان بالفانله.


    روايح....يعني هو كده غلطان..؟


    جعلص....طبعا والغلط راكبه من ساسه لراسه.

    روايح....واللي يغلط يستاهل ايه...؟


    حنكش....من ناحية يستاهل...هو يستاهل كتير.


    روايح...(محدثه فوزي)اهم اللي اتحميت بيهم حكموا عليك

    انجر قدامي...يومك اسود انت والمحروس ابنك.


    (تخرج روايح وهي تشد فوزي)

    حنكش...لا حول ولا قوة الا بالله...دي ست مايقدرهاش

    غير ربنا.

    جعلص....معاك حق ياواد ياحنكش..

    حنكش...حتي في القسم بيخافوا منها ويعملولها الف حساب.


    جعلص...لا مش كده بالظبط...هيه بتنفعهم في الانتخابات

    وبتشيلهم..بتلملهم نسوان الحاره والحارات اللي

    جنبينا..عشان ماحدش يروح ينتخب ولا يتنيل

    وينجحوا اللي عاوزين ينجحوه...حروح بقي الحق

    رزقي....انت حتضيع عليا اليوم...هو بصحيح

    الواد عباطه لسه ماجاش...؟


    حنكش...زمانه جاي...ده معاده..؟

    جعلص...الواد ده ابن حلال وكل يوم يشحتني ماسوره.
    لما اخلص شغل حبقي اعدي عليه.والنبي ياحنكش
    تخليه يحجز لي ماسورتي..انا عارف انه بيخلص المواسير
    بدري..

    حنكش...الطلب علي المواسير كتير...مش عارف ايه السر..؟

    جعلص...ياحنكش الواد عباطه بيجيب عضم معتبر.

    حنكش...ياعم جعلص..كده مش حتلحق الاصطباحه واتكل ع الله.؟

    جعلص...معاك حق...(يخرج جعلص)

    حنكش..(محدثا نفسه)....يوم نكد من اوله..الا مافيه حتي
    اصطباحية شيشه...هي الناس عامله اضراب ع القهاوي
    وادي قعده(يجلس)..الحاره مالهاش طعم من غير الواد عباطه

    (يدخل عباطه صبي المعلم عجلان)

    عباطه...احلي سلام بالنعناع لاجدع حنكش في حارة السد..؟

    حنكش...واحلي صباح بالينسون للواد عباطي صاحبي المجنون.

    عباطه...بقولك ايه ياصاحبي..ظبط الكلام وبلاش الشغل اللي
    ع الريحه ده عشان مافورش دمك...

    حنكش ..(يقترب من عباطه)..بهزر معاك ياواد..انت صاحبي وكنت
    لسه علي بالي...انت ايه اللي اخرك كده النهارده.

    عباطه...مش عارف مع اني حلمت اني قمت بدري..

    حنكش...تلاقي المواصلات كانت زحمه في المنام...

    عباطه..اه والله...انا مالقتش مواصلات اخدتها مشي وانا نايم.

    حنكش...اياك تكون قابلتك لجنه...؟

    عباطه..صح ياحنكش وكأنك كنت معايا في الحلم..قابلتني
    لجنه كبيره..بوكس علي كام مكروباص..وماخلوش حد
    الا وركبوه..

    حنكش...وطبعا خدوك وركبوك..؟

    عباطه...لا..وخلصت كل الناس اللي ركبت وروحتهم..

    حنكش...راحوا ماسكين فيك انت..؟

    عباطه...ودي تيجي...كلهم ماقدروش عليا..طحت فيهم
    طيخ طاخ..لحد ماوقعت ع الارض..؟

    حنكش...راحوا ماسكينك..؟

    عباطه...هو انا عبيط عشان اديهم فرصه..؟

    حنكش...عملت ايه يعني...؟

    عباطه ...صحيت من النوم قبل ما اتنفخ..؟

    حنكش...سمي كده واتكل علي الله وافتح محلك.

    عباطه ...معاك حق قبل مايجي المعلم ويبهدلك )
    يتجه عباطه الي المحل ويفتحه ويخرج ترابيزه ويضعها امام
    المحل ويضع عليها كميات كبيره من العضم وحنكش ينظر
    له في زهول كلما اتي بكميه من العضم.(

    حنكش...ايه ياعباطه..انتوا مش دابحين ولا ايه.

    عباطه...لا .دابحين والتلاجه مليانه لحمه...؟

    حنكش...طيب علقلك فخدتين...؟

    عباطه...لا ياعم بلاش...؟

    حنكش...بلاش ليه مش عاوزين تبيعوا..؟

    عباطه ..عشان الحسد..؟

    حنكش...حسد..حسد ايه ياواد ياعباطه..؟


    عباطه...لما بعلق لحمه لاهل الحاره..بيجوا يتفرجوا ومايشتروش
    ويقعدوا يشموا فيها واللي يجيب رغيف ويغمس من بعيد

    حنكش..الحاره كلها بتشم...؟

    عباطه...اه والله ويشموا ببلاش..

    حنكش...انتوا علي كد ارخص وسيلة ادمان في السوق.

    عباطه...اه...الواحد من دول يتفرج ويشم وياخد نفس طويل
    ويطب ساكت لحد اول الشهر..وبعدين يشتري ربع كيلوا
    يعالج بيه البيت.

    حنكش...ربع كيلوا اول الشهر وطول الشهر بقي.

    عباطه...بيقضوها عضم..الطلب ع العضم كتير وبالذات الرجاله
    عشان البهاريز بتعمل معاهم شغل لحد اخر الشهر..

    حنكش...والاولاد..؟

    عباطه...عايشين علي الشوربه ومصمصة العضم..

    حنكش...عشان كده بلاقي عندك زحمه...

    عباطه...ماهو كمان المعلم عجلان غلا المواسير..

    حنكش..اه..معلمك مفتح قوي ويعرف يستغل الظروف.

    عباطه..اه..ده مابيسبش سقط ولا لقط الا يبيعه..؟

    (يدخل المعلم عجلان)

    حنكش..(هامسا لعباطه)...ادي معلمك وصل وانا حروح اشوف شغلي

    عجلان...ظبط كل المظابيط ياواد ياعباطه...؟

    عباطه...كله السطه يامعلم..فرشت العضم بره وخبيت اللحمه
    جوه...

    عجلان..(ينادي علي حنكش)...ولا ياحنكش..؟

    حنكش...(يقترب من عجلان)...احلي صباح لنوارة معلمين حارة السد

    عجلان...هاتلي كرسي معسل وظبطلي القعده..؟

    (حنكش ياتي بترابيزه صغيره وكرسي للمعلم عجلان)

    عجلان...(محدثا عباطه)..قولي ياعباطه البت مايسه نزلت ولا
    لسه..؟

    عباطه...لسه مانزلتش هي وخطيبها يامعلم..؟

    ..(حنكش يضع الشيشه امام عجلان الذي ياخذ نفسا عميقا)

    عجلان...انا بسأل عليها هي ياجحش..ماتجيبش سيرة خطيبها قدامي

    عباطه...معاك حق يامعلم..انا غلطان وابن ستين يامعلمي
    ..البنات ماليه البلد واشكال والوان ماتسيبك
    من البنت المتعنظزه دي...؟

    عجلان...ماهي المتعنظزه دي ياولا..اللي مكلبشه في قلبي
    وبهدلت فشتي...عشان كده لازم ادبحها..؟

    عباطه...(ساخرا)...هي بهيمه حتدبحها يامعلم..؟..دي بت مش
    ساهله وواثقه في نفسها قوي وحلوه قوي يامعلم..؟

    عجلان...هي حلوه بعقل ياولا.....دي عنيها ولا اجدع جاموسه.؟

    عباطه...بس رجليها رجلين معيز...؟

    عجلان...معيز ايه ياجحش.؟...دي رجلين غزلان وشعرها ريش
    نعام...وشفايفها,,,؟

    عباطه...شفايف خرفان..وخلص يامعلم..احسن البنت جايه.

    (تدخل مايسه وحبيبها عصام)

    عصام..(محدثا مايسه)...حوصلك الاول وبعدين حروح اشوف الوظيفه
    وربنا يسهل ويقبلوني..؟

    مايسه...لا انا حروح لوحدي وانت اتكل علي الله الوظيقه اهم
    ولو ربنا ماسهلش فيها دور علي غيرها..؟

    عباطه..(ساخرا من عصام)...يارب يدوروا عليك في الدنيا
    والاخره ما يلاقوك يابعيد.؟..

    عصام..(محدثا عباطه)...الكلام ده ليه انا ياعباطه..؟

    عجلان...لا مش ليك..للست مايسه بيقولها ازاي الحلو يعدي
    مايصبحش علينا..؟

    (باشمئزاز)...انا اسفه يامعلم..ماختش بالي ازيك وعامل ايه

    عجلان...انا ميت فل ومش ناقصني غير رضاك ياجميل..؟

    عصام..(محدثا مايسه)..ياللا بينا احسن..؟

    مايسه...بعد اذنك يامعلم..؟

    عجلان...اذنك معاك ياست الستات..؟

    عصام..(ساخرا)...اي خدمه يامعلم..؟

    عباطه...الخدمه الوحيده اللي عاوزها منك المعلم..انك تروح
    ماترجعش...؟

    عصام...اروح ما ارجعش..؟ انا..؟

    عجلان...اه ماترجعش غير بشغل قصد عباطه بدل ما انت عواطلي
    ومعطل بنات الناس معاك.

    عصام...انا عواطلي يامعلم..؟

    عباطه..اه ومغنواتي وحش كمان...

    مايسه..(معترضه)..لا ياعباطه عصام صوته حلو بس الناس هي
    اللي مش فاهمه..

    عجلان...وابقي قابليني لو حد فهم منه حاجه..؟

    عباطه...معاك حق يامعلم ..امبارح بوظ الفرح بتاع الواد
    فوطه المكوجي..؟

    مايسه..(محدثه عصام)...هي العركه بتاعت فرح امبارح كانت
    بسببك..؟

    عصام...لا والله ماليش علاقه بيها ياروحي...

    عباطه...لا ..انت سبب العركه لما غنيت والناس مافهمتش حاجه

    مايسه...وانت غنيت ايه في الفرح ياعصام..؟

    عصام...غنيت فوق الشوق ورماني زماني..

    عباطه..دي اول العركه..انت قولت فوق الشوك وهما خلوك فوق
    القزاز..(محدثا عجلان)..دول حدفوه باكتر من عشرين
    صندوق بيره يامعلم.

    عجلان...معاهم حق..هو ايه اللي بيقوله اخينا ده..؟

    عباطه...كله كوم..ولما قال اني بغرق كوم تاني..قعد
    يقول اني بغرق..والناس مساطيل وسكرانين
    واللي يقول احدفله عوامه واللي يقول حاسب
    الدوامه ياولا..

    عجلان ...كل ده حصل امبارح..

    عباطه وبعدين زودها حبتين..؟

    عجلان..ازاي...؟

    عباطه...قال اني بغطس تحت الميه.

    عجلان...ههههه ,.,حلوه بيفطس تحت الميه وحصل ايه.؟

    عباطه ..السكرانين والمساطيل فاقوا عليه ودربوه..

    عجلان..(محدثا عصام)...انت ياابني كنت بتغني في فرح ولا
    علي ترعه...؟

    مايسه...معاهم حق يتريقوا..انت بتغني رساله تحت الماء
    في فرح شعبي..؟

    عصام...اذا ماكنتش اغني لعبد الحليم..اغني لمين..؟

    عباطه..(ساخرا)...مين عبد الرحيم ده يامعلم..؟

    عباطه...مش عارف يمكن يكون الفكهاني اللي علي اول الحاره.

    عصام...بينا نطلع من الحاره دي..

    مايسه...روح انت شوف اللي وراك وانا حروح مشواري.

    عصام...ماشي..بس حركبك واشوف اللي ورايا..؟

    مايسه..(محدثه عجلان)...سلام يامعلم..

    (تخرج مايسه وعصام)

    عجلان...وبعدين ياواد ياعباطه..؟

    عباطه...مش عارف يامعلم...كل خططك فاشله معاها نجرب
    الرسايل..

    عجلان...رسايل ايه..؟

    عباطه...رسايل المحمول...انا امبارح اشتريت تلات رسايل
    الواحده بعشره جنيه والله اشتريتهم عشانك يامعلم..؟

    عجلان وهما فين ..الحقني بيهم...

    عباطه...هات تلاتين جنيه..؟

    (عجلان يخرج المبلغ من جيبه ويناوله لعباطه)

    ..(يلعب في المحمول)...بعتلك الرسايل. وريني موبايلك
    (يلعب في الهاتف)...اهم وصلوا عندك.

    عجلان...وبعدين...؟

    عباطه...انت ابعتلها بقي..؟

    عجلان...انا مابعرفش ابعت...؟

    عباطه...ولا انا ..انا اتعلمت ابعتلك انت بس..؟

    عجلان...وحنعمل ايه دلوقت..؟

    عباطه...مافيش غير الواد حنكش..ده ابن حرام..؟

    ...(عجلان ينادي علي حنكش..)..ولا ياحنكش..؟

    (يدخل حنكش)
    حنكش...طلباتك ياسيد المعلمين..؟

    عجلان...خد اقرالي الجوابات اللي بعتهالي عباطه وبعدين
    ابعتهم علي تلفون مايسه..

    (حنكش يمسك تليفون عجلان ويقلب فيه)

    حنكش...الرساله الاولي...بانجو انت تاني...مش كنا هيرويين مع
    مع بعض..مافيش حشيش فيك..بودره تندم ياجميل.

    عجلان...ايه ده ياواد ياعباطه ده جواب ابعته لمايسه.؟

    حنكش..لا دي تروح علي الغرزه علي طول.

    عجلان...دي بعشره جنيه..؟

    عباطه...منا مابعرفش اقرأ يامعلم..؟

    عجلان...قولي اشتريتها من مين وانا حعلقه قدام الدكان.

    ...عباطه...من..(.يتلعثم.)..

    حنكش...تلاقيه جابها من شوية مساطيل..؟

    عباطه....صح يامعلم...انا قلت هما دول اللي بيعفوا يقولوا.

    حنكش...انا عندي حل يامعلم مش حيخيب ابدا.؟

    عجلان...الحقني بيه وليك الحلاوه ياولا..

    حنكش...حديكم عنوان راجل مبروك وحلال لكل العقد .

    عجلان.....ويخلي مايسه تحبني..

    حنكش..اه وابو مايسه وام مايسه كمان..


    بلاك اوت

      الوقت/التاريخ الآن هو الأحد سبتمبر 24, 2017 7:29 pm