منتدى الفراعنة

منتدى أ/سمير حماية

المواضيع الأخيرة

» لوحة الشرف .......
الثلاثاء أغسطس 29, 2017 11:42 am من طرف سميرحمايه

» الأسد والثعلب
الثلاثاء أغسطس 22, 2017 8:51 pm من طرف سميرحمايه

» اكلي لحوم البشر
الإثنين أغسطس 21, 2017 3:58 am من طرف سميرحمايه

» خواطر ساميرية
الجمعة أغسطس 04, 2017 10:35 am من طرف سميرحمايه

» الحمار والثعلب قصة قصيرة
السبت يوليو 15, 2017 5:10 pm من طرف سميرحمايه

» طالوت ملكا..تأليف سمير حمايه..المشهد الاخير( المنظر الاول)
الإثنين يونيو 19, 2017 7:54 pm من طرف سميرحمايه

» ياقوتة.......
الأربعاء مايو 31, 2017 9:18 am من طرف سميرحمايه

»  مسرحية طالوت ملكا تأليف سمير حمايه المشهد الاول(المنظر الرابع والخامس)
السبت مايو 20, 2017 12:46 am من طرف سميرحمايه

»  مسرحية طالوت ملكا...تاليف سمير حمايه..المشهد الثاني(المنظر الاول)
السبت مايو 20, 2017 12:43 am من طرف سميرحمايه

التبادل الاعلاني


    ببساطه زمن عباطه...تأليف سمير حمايه..(اللوحه الخامسه)

    شاطر


    تاريخ التسجيل : 01/01/1970

    ببساطه زمن عباطه...تأليف سمير حمايه..(اللوحه الخامسه)

    مُساهمة من طرف  في الثلاثاء يونيو 14, 2011 1:45 pm

    اللوحه الخامسه


    داخل حارة السد...تدخل مايسه وخلفها عادل.


    مايسه......انا مابعتش نفسي ياعادل..؟

    عادل ....لا..بعتي نفسك لعجلان يامايسه ومابعتيش نفسك وبس..انت كمان بعتي حبنا

    مايسه...انا مابعتش نفسي لحد..ولا بعت حبنا....كان لازم اعمل كده...الفقر محاوطنا من كل ناحيه في حارة السد

    ..ومن ساعت متخرجنا تقدر تقولي عملت أيه...انا فشلت وانت فشلت...؟

    عادل...انا مافشلتش لكن الظروف كلها واقفه ضدي....؟

    مايسه....ظروف ايه اللي بتتحجج بيها..ده مجتمع واحنا جزء منه ولازم نتعايش معاه ونجاريه.

    عادل.....وعشان نتعايش معاه نبيع ضميرنا.

    مايسه....ماحدش قال كده..لكن السوق له اذواق ومتطلبات ومايقدرش جزء يأثر علي الكل...

    الكل بيفرض نفسه علي الجزء.

    عادل.....والاحلام الجميله اللي عشناها.

    مايسه...دي في خيالي انا وانت بس....؟

    عادل...افهم من كده انك كمان مش باقيه عليا..؟

    مايسه...لا..انا بحافظ عليك وعلي حبنا وانت كمان لازم تحافظ عليا علشان حبنا مايموتش

    وسط الفقر..؟

    عادل...يعني ايه ..مش فاهم..؟

    مايسه.....يعني حاول تنسي القديم وتجاري الجديد بفكره واوضاعه.

    عادل...انسي القديم....انسي الاطلال...ولا انسي فاتت جبنا...انسي من غير ليه..؟

    مايسه....لا طبعا صعب يتنسوا...لكن احتفظ بيهم ليك ولذوقك انت...لكن ماتفرضش

    ذوقك علي الناس...الاغاني دي ظهرت في وقت كان فيه حب وتأمل وحياه

    ..لكن دلوقتي...

    عادل...(مقاطعا)....دلوقت عصر التيك اواي.

    مايسه....ايوه...الاغنيه بقت زي الساندوتش ..ماحدش فاضي.

    عادل....صحيح ماحدش فاضي...بقي الحب تيك اواي والاكل تيك اواي والصداقه تيك اواي

    ايه اللي مابقاش تيك اواي في حياتنا...انت مش ممكن تكوني مايه اللي انا عرفتها

    وحبيتها.

    مايسه...اسمع ياعادل..اللي تعمله دلوقتي برضاك احسن ماتعمله بكره غصب عنك

    صدقني ماقدامكش طريق تاني ..والا حتبقي اخترت تعيش ميت.

    عادل....يعني يااختار اكون عباطه يااما اعيش ميت..؟

    مايسه....وماه عباطه...بص حواليك...حتلاقي اللي عايشين معظمهم عباطه

    وبعدين عباطه شريكه كسر الدنيا وكل الفضائيات بتذيع اغانيه ومافيش مكان

    مابيتسمعش فيه عباطه.

    (يسمع صوت اغنية عباطه )....سامع....ادي اغاني عباطه في كل المحلات

    والعربيات ملاكي واجره...مش حتلاقي غير عباطه...بقالنا تلاتين سنه

    حياتنا كلها عباطه.


    عادل......انا مش حستسلم يامايسه...وحثبتلك صحة كلامي...الناس اللي فاكراهم عباطه

    مسيرهم يوم يفوقوا ويصحوا ويتخلصوا من عباطه.

    مايسه...ياريت ياعادل....دي احلام حتفضل عايش جواها...اوهام بتقنع بيها نفسك

    ...اتمني لك كل خير....لكن صدقني حتفضل تحلم وبس وتعيش كابوس الحياه

    المر..

    عادل...مش حفشل يامايسه ومش حكون عباطه...(يصرخ بشده)....مش حكون عباطه

    (يخرج عادل وهو يصرخ ...مش حكون عباطه.....يتجمع مجموعه من اهل

    الحاره لتوقيع الاتو جروفات من مايسه...ويدخل حنكش مسرعا)

    حنكش...(يمنع الجمهور عن مايسه)...بالراحه علي الاستاذه ياجماعه (محدثا مايسه)

    منوره الحاره ياست الكل يامشرفانا.

    مايسه....الحاره منوره باهلها ياحنكش.

    حنكش...امال الفنان الكبير ابن حتتنا فين...؟

    مايسه...عباطه بقي حاجه كبيره قوي ومعجبينه كتير والصحافه والتلفزيون مش

    سايبنه في حاله.

    حنكش....منا عارف....مش هو صاحبي واحنا الاتنين صبيان زي بعض..ماتاخدوني

    اغني معاكم يااستاذه.

    مايسه..(ساخره)...تغني فين ياحنكش هيه ناقصه.

    حنكش....ليه هو انا مش زي عباطه..(يدعو علي معلمه)...منك لله يامعلم حلبسه.


    مايسه...ماله المعلم حلبسه..؟

    حنكش....قولتله نعمل زي المعلم عجلان شريط...

    مايسه....دي حظوظ ياحنكش وكل واحد بياخد نصيبه.

    حنكش...والواد عباطه رزقه في رجليه...قوليلي هو مش جاي الحاره ولا خلاص

    حارة السد مابقتش قد المقام ونسي ناسها واصحابه.


    مايسه.....ماتقلقش زمانه علي وصول.


    (يدخل عباطه في زحام شديد حوله من اهل الحاره..احد افراد شباب الحاره يمد له اوتوجراف

    ليوقعه)

    الشاب...والنبي تكتبلي كلمه ياعباطه.

    عباطه....انا ياابني لا بعرف اكتب ولا اقرا...هات ختامه وابصملك.

    حنكش...(يقترب من عباطه ومحدثا جماهير الحاره)...سيبوا الاستاذ يريح شويه وبعدين

    حنعملكم اللي عاوزينه...(محدثا عباطه)...نورت الحاره ياملك.

    عباطه....ازيك ياواد ياحنكش..

    حنكش....كويس طول ما انت رافع راسنا.

    عباطه...وازاي المعلم حلبسه ..لسه بينونو ويخربشك.

    حنكش....لسه والله ياصاحبي...بيفكرني فار....بقولك ايه ياملك.

    عباطه...قول ياحنكش منا عارفك..

    حنكش....ليه عندك طلب.

    عباطه....عارف عاوز الحداشر جنيه تمن الطلبات الي اخدتها منك..

    حنكش...لا مش عاوزهم...وبعدين احنا صحاب ونشيل بعض...انا كنت عاوزك

    تغني في فرح ابن اختي.

    عباطه.....موافق..ومش حاخد فلوس وحعمل واجب معاك.

    حنكش.....ربنا يخليك ياملك وانا الحداشر جنيه مسامح فيهم.

    عباطه....بس حاخد النقطه اللي حتنزل عليا في الفرح.

    حنكش ...وليه بقي...؟

    عباطه....عشان اعوض مصاريف العيال اللي بيطبلوه ورايا..بتاع الطبله

    وبتاع البرج.

    مايسه..(تضحك)....برج ايه ياعباطه...اسمه الاورج.


    عباطه.....ايوه ..منا عارف.

    حنكش...وانا موافق ياعم...مع اني كنت طمعان في النقطه.

    عباطه....وانا فاهمك ياصاحبي...عاوزني اغني وتلم من ورايا النقطه.

    حنكش....وفيها ايه مش صاحبي.

    مايسه....كفايه انه حيجي يغني في الفرح ياحنكش .ماتطمعش.

    عباطه....سيبني بقي ياعباطه...اقول كلمتين لاهل الحاره عشان المعلم عجلان.

    حنكش....والمعلم عجلان ماله.

    مايسه...اصله داخل انتخابات المجلس عن حارة السد.


    (يدخل ابو العريف وبجواره المعلم عجلان ومجموعه من الشباب يحملون لافتات

    انتخابيه...مكتوب علي اللافتات الاتي...انتم في يد امينه...خير من يمثلكم..من اجل

    الرخاء والاستقرار....نصير الغلابه. ورمز الجمل...نعم للاستقرار..مرشحكم الوطني)


    ابو العريف...(يهتف)...ماتقوليش ماتعدليش..غير المعلم عجلان ماتلاقيش.

    الجمهور...يردد خلف عجلان...

    ابو العريف...زحمه يادنيا زحمه...ومعلمنا حيشبعنا لحمه.

    الجمهور...يردد خلف ابو العريف...


    ابو العريف..(محدثا عجلان)..قول كلمتين لاهل الحاره...

    عجلان...ااقول ايه...؟

    ابو العريف........قول اي حاجه عشان المنظر العام..ات كده كده ناجح.

    عجلان...(محدثا الجمهور)....انا لما ادخل بيت الكلاوي.

    ابوالعريف...(همسا للمعلم عجلان)...بيت كلاوي ايه يامعلم...قول لماد ادخل

    مجلس الشعب.

    عجلان...ماشي...(محدثا الجمهور)....انا لما ادخل بيت العب...انا بعون الله حشفي

    كل مشاكل الحاره...واعزل العضم..بقصد اعزل كل حاجه لوحديها.


    صوت من الجمهور....يعني ممكن تعبرعن امالنا وطموحاتنا



    عجلان........انا احسن واحد يبعبر عنكم...انا كلي معبره ياابني.

    صوت اخر...يعني تقدر تواجه التحديات التي بتمر بيها الحاره..؟


    عجلان...ااقدر ونص اي حد يمر في الحاره حدبحه.


    صوت اخر...قلنا ايه البرنامج بتاعك...

    عجلان...يعني ايه مش فاهم....؟


    ابو العريف...(هامسا للمعلم عجلان)....بيقولك ايه اللي حتعمله لاهل الحاره.

    عجلان.....انا بعد مااشفي المشاكل واسلخها حعمل حاجات كتير.


    صوت اخر...زي ايه...؟


    عجلان.....حعمل سلخانه كبيره للبهايم الصغيره.

    ابو العريف....ملاعب للشباب يامعلم.

    عجلان.....ايوه ملاعب للعيال واعمل دار كبيره للرجاله الكندوز.

    ابو العريف..(هامسا)....دار للمسنيين.

    عجلان...اه زي ما قال ابو العريف...وحشفي مشاكل الشباب.

    ابو العريف...تحل كل مشاكل الشباب.

    عجلان...اه هو كده نحل كل مشاكل الشباب.

    صوت اخر....والشمبري يامعلم.


    عجلان...شمبري...شمبري ايه...؟

    ابو العريف...الموظفين والصنايعيه.

    عجلان....دول مش شمبري...دول سقط...حنضفهم واروقهم.


    ابو العريف....(يهتف)....يامعلمنا ياابهه ..ايه العظمه دي كلها.

    الجمهور.....يردد

    ابوالعريف...(محدثا عباطه)...قول كلمتين لاهل الحاره يانجم ياكبير.
    (استعراض غنائي وراقص واغنيه لعباطه كلها شعارات زائفه
    للمعلم عجلان)
    بلاك اوت

      الوقت/التاريخ الآن هو الأحد سبتمبر 24, 2017 7:32 pm