منتدى الفراعنة

هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.
منتدى الفراعنة

منتدى أ/سمير حماية


المواضيع الأخيرة

» تطبيق لايف هاك تجارب ونصائح وأفكار منزلية
  ببساطه زمن عباطه...تأليف...سمير حمايه...اللوحه السادسه. Icon_minitime1الثلاثاء أبريل 19, 2022 7:25 pm من طرف hanan45

» تطبيق وصفات طبخ
  ببساطه زمن عباطه...تأليف...سمير حمايه...اللوحه السادسه. Icon_minitime1الخميس أبريل 14, 2022 5:57 pm من طرف hanan45

» تفسير الاحلام كاملا بالحروف
  ببساطه زمن عباطه...تأليف...سمير حمايه...اللوحه السادسه. Icon_minitime1الأحد أبريل 03, 2022 9:48 pm من طرف hanan45

» تطبيق وصفات طبيعية للتجميل
  ببساطه زمن عباطه...تأليف...سمير حمايه...اللوحه السادسه. Icon_minitime1الثلاثاء مارس 29, 2022 11:12 pm من طرف hanan45

» الاتجاهات الحديثة في الكتابة القانونية
  ببساطه زمن عباطه...تأليف...سمير حمايه...اللوحه السادسه. Icon_minitime1الإثنين سبتمبر 27, 2021 10:36 am من طرف sabra group

» الاتجاهات الحديثة في الكتابة القانونية
  ببساطه زمن عباطه...تأليف...سمير حمايه...اللوحه السادسه. Icon_minitime1الإثنين سبتمبر 27, 2021 10:36 am من طرف sabra group

» الاتجاهات الحديثة في الكتابة القانونية
  ببساطه زمن عباطه...تأليف...سمير حمايه...اللوحه السادسه. Icon_minitime1الإثنين سبتمبر 27, 2021 10:35 am من طرف sabra group

» الاتجاهات الحديثة في الكتابة القانونية
  ببساطه زمن عباطه...تأليف...سمير حمايه...اللوحه السادسه. Icon_minitime1الإثنين سبتمبر 27, 2021 10:35 am من طرف sabra group

» الاتجاهات الحديثة في الكتابة القانونية
  ببساطه زمن عباطه...تأليف...سمير حمايه...اللوحه السادسه. Icon_minitime1الإثنين سبتمبر 27, 2021 10:32 am من طرف sabra group

التبادل الاعلاني


    ببساطه زمن عباطه...تأليف...سمير حمايه...اللوحه السادسه.

    avatar


    تاريخ التسجيل : 01/01/1970

      ببساطه زمن عباطه...تأليف...سمير حمايه...اللوحه السادسه. Empty ببساطه زمن عباطه...تأليف...سمير حمايه...اللوحه السادسه.

    مُساهمة من طرف  الثلاثاء يونيو 14, 2011 3:38 pm


    اللوحه السادسه


    داخل شركة الانتاج.

    (يدخل ابو العريف ممسكا بهاتفه زمتحدثا)

    ابو العريف مين قناة ال س ان ان..لا والله الاستاذ بتاعنا

    مشغول لحد سنتين قدام.

    (يترك الهاتف وسرعان ما يرن مره اخري)

    وبعدين..انا تعبت مكالمات...ايوه مين معايا ميسي

    ..ميسي مين...اه بتاع برشلونه...ايه...عاوز حفلتين

    لعباطه....لا والله عباطه مضي عقد مع ريال مدريد

    (يدخل عجلان منتشيا)


    عجلان...ايه الاخبار ياوش السعد انت...عليا النعمه مافيه منك

    واحد تاني.

    ابو العريف...ولسه يامعلم ....انت شوفت حاجه...بكره كمان تاخد

    الحصانه.

    عجلان....انا خلاص شبعت فلوس...انا مش عاف حقدر اصرفها

    امتي.

    ابو العريف...احنا لسه في اول خطوه يامعلم..

    عجلان....انت كنز وعليا النعمه..انت عندي اغلي من بهايم

    الدنيا كلها.

    ابو العريف....انسي يامعلم...ماحدش حايحصلك وحنعمل سينما

    ومسرح تعمل من وراهم كوم فلوس تقف عليه

    تشوف امريكا.


    عجلان....بقي الواد عباطه الاهبل الناس تجري وراه كده..؟


    ابو العريف....ده بقي نجم النجوم.

    عجلان........كله كوم والبنات اللي بتجري وراه كوم تاني




    وادور علي حاجه عدله في خلقته ما لاقيش

    مش عارف عاجبهم في ايه...؟

    ابو العريف.....مش مهم شكله عندهم دلوقت..المهم هو مين

    دلوقتي عباطه احسن مغني في البلد.


    (يدخل عباطه بملابس غريبه جدا ويلهث من

    شدة الارهاق)

    عباطه......انا خلاص فطست من الناس..ايه ده

    امال لو ركبت اتوبيس حايحصل ايه..؟


    ابو العريف...انت دلوقت بقيت معروف.

    عجلان......اه زي مابيقولك انت بقيت خروف.

    عباطه......انا نفسي اكل طبق كشري مش عارف ياناس

    ...سندوتش كبده مش عارف..زهقت من الاكل

    بتاعكم اللي مابيشبعش.


    ابو العريف.....حياة النجوميه صعبه...وانت بقيت شخصيه

    مهمه للرأي العام.

    عباطه......والنبي بلاش الكلام المكلكع ده بتاعك وفهمني

    واحده واحده.

    عجلان...يابهيم...هو بيقولك بقيت مهم زي النقل العام.

    عباطه....انت حتعملي فاهم وانت شبهي.


    (يدخل عثمان الساعي)

    عثمان.....اجيب لكم ينسون بالحليب.

    ابو العريف....اه طالما حتجيب يبقي فيه حد بره

    انت من ساعة ماشوفنا خلقتك ولا حتي

    شوفنا فنجان قهوه...قول مين بره

    عثمان....واحد مذيعه اسمه جنان فتحي.



    ابو العريف خليها تدخل...


    (تدخل المذيعه جيلان فتحي)

    جيلان....(تعرفهم بنفسها)....جيلان فتحي مذيعه ومعدة برامج.

    عجلان....اسمك ايه....؟

    جيلان.....جيلان فتحي.

    عجلان......جنان فتحي اه .

    ابو العريف.....تحت امرك يااستاذه.

    جيلان...(محدثه عباطه)...انت الاستاذ عباطه...مش كده.

    عباطه....اه ...انا عباطه...عرفتيني لوحد ك مش كده

    ولا شوفتيني في الراديو.

    جيلان....وهل يخفي القمر....انت في كل حته يااستذ.


    ابوالعريف....طلباتك يااستاذه...انا ابو العريف عرف الديك

    مدير الشركه ومدير اعمال عباطه.


    عجلان...وانا بقي الكل في الكل ياست الكل.

    ابو العريف..(مشيرا علي عجلان)...ده الاستاذ عجلان صاحب

    الشركه والمنتج المعروف.

    جيلان....جميل....كده مش حنختلف.


    عجلان......ربنا مايجيب حاجه وحشه...اللي انت عاوزاه موجود.


    ابو العريف....(محدثا عجلان)...استني شويه يامعلم عجلان.


    (تقترب جيلان من عجلان وتغريه)

    عجلان.....دي غلبانه ومنكسره ابقي راضيها ياابو العريف.

    جيلان.....علشان كده انا طمعانه في كرمك يااستاذ.


    عجلان....وانا وكبدتي وفشتي بين ايديكي.




    جيلان....انا عاوزه الاستاذ عباطه يسجل معايا في برنامج


    الاشاره الحمره.


    عجلان....وماله حتي لو عاوزاه في الاشاره الصفره والخضره.

    انا موافق.

    ابو العريف....استني يامعلم...انت في قناة ايه..؟


    جيلان.....قناة الاحلام.


    عجلان......مش مهم احلام كوابيس ..انا موافق.

    ابو العريف....حتدفعولنا كام....؟


    جيلان.......المعلم وافق ببلاش...(تقترب من عجلان)...صح

    يامعلم.


    عجلان.....ايوه صح....ياروح المعلم وفشته.


    جيلان...(بفرح)....ربنا يخليك ليه يااجدع واحلي معلم في الدنيا.


    عباطه....وانا مافيش حاجه ليه...؟


    عجلان....ايوه مافيش حاجه ليك....لا ليه ولا ضاني.

    جيلان....ازاي يامعلم (محدثه عباطه)...انا كلي ليك ياحبيبي.

    (تقترب من عباطه)

    عباطه....اه.....الحقيني يااما...كلك ليه انا..؟


    جيلان....ايوه ياروحي.


    عجلان...(محدثا عباطه بغيظ).....الواد كلها مني.


    عباطه.....معلش يامعلم تكون في ايدك وتقسم لغيرك.

    عجلان...(محدثا جيلان)....ايه اللي عاجبك فيه ده حتي



    شبه الجدي المعفن.


    ابو العريف.....يامعلم الصنف ده بيحب اي حد وراه مصلحه.

    جيلان....(تقترب من عجلان)....دلوقت مش فاضل غير طلب

    صغير يامعلم.

    عجلان....خليكي معايا وانت تكسبي...انا الكل في الكل وحوافق

    علي كل طلباتك...بس نروح السلخانه.

    جيلان......نروح فين...؟

    ابو العريف....(محدثا عجلان)...استني بقي شويه يامعلم خليني

    اتعامل..الصنف ده لو اديته صوبع يطمع في كفك

    ولو اديته كفك حياكل دراعك.

    عجلان....ماتظلمهاش دي باين عليها غلبانه وكلها غلب.

    جيلان....اه والله يامعلم....انا غلبانه خالص...بص يامعلم

    احنا حنحتاج عباطه يعمل اعلانات.


    عباطه....اعانات ..اعانات لمين...حتشحتي بيه..؟


    ابو العريف....اعلانات مش اعانات ياعباطه...يعني حتصور


    اعانات تتذاع في التلفزيون.

    ابو العريف...زي اعلان سيجنال ال 2

    عباطه...سجنتوه ليه...؟

    ابو العريف...سجنا ايه وهببنا ايه...ده معجون اسنان يجيبوا

    واحد ماسك فرشة سنان وبينضف في اسنانه

    ويقولك شوفتوا المعجون ده بس حايحميه من التسوس..

    عباطه....لا انا مااعرفش الموضوع ده...انا بنضف سناني

    بسلك المواعين.

    عجلان...(لعباطه)....يابهيم السلك يخلي سنانك تصدي فرشة

    البلاط احسن.



    ابو العريف...(محدثا جيلان).....المهم يااستاذه ...هو حيعمل كام اعلان..؟


    جيلان....تلات اعلانات...وحياخد في كل اعلان مية الف جنيه.


    ابو العريف.....ماينفعش.....مش اقل من نص مليون جنيه في الاعلان..

    عباطه........ياعم اللي يجي منها فايده.

    ابو العريف....استني انت...(محدثا جيلان)...قلتي ايه....؟

    جيلان............موافقه بس حاخد عموله عشره في الميه.


    عجلان...(محدثا جيلان)...انت موافقه علي نص مليون جنيه.


    ابو العريف...(محدثا عجلان)...دي كمان اتشطرت علينا...عباطه

    يامعلم يستاهل مش اقل من المليون جنيه في الاعلان.

    عباطه.....والله ميه ميه...من غير تعب ولا زريبه وسطور

    شغله حلوه قوي.

    ابو العريف...(محدثا جيلان)....وايه المنتجات اللي حيعلن عنها

    عباطه.


    جيلان....اول اعلان...من شركة ابراهيم لزراعة البرسيم.


    عباطه.....ودول حعملهم ايه جاموسه.

    عجلان.....اه...وتمشي تنطح في كل اللي يقابلك...هي البهايم ورانا

    ورانا.


    جيلان....لا مش كده يامعلم....عباطه حيلبس ابيض في ابيض

    ويمشي وسط البرسيم.


    عجلان.....اه ويبقي تور الله في برسيمه.


    جيلان....لا مش كده....وهو في الغيط ولابس ابيض في ابيض

    حيمسك حزمتين برسيم في ايده...ويقول اصحي ياعبد الدايم




    واكل البهايم...برسيم سليم من عند عم ابراهيم.


    ابو العريف.....والاعلان التاني عن القمح....


    جيلان.....قمح ايه....احنا نزرع برسيم اه ونأكل البهايم اه

    لكن نزرع القمح لمين....نهر النيل بقي صلصه.


    عجلان...بجد بقي صلصه..؟


    ابو العريف....اه وياريته حيكفي الكوسه اللي عندنا...قولتي

    بقي الاعلان التاني لمين.

    جيلان.....الاعلان التاني من شركة العياط لتصنيع المشاط.

    عجلان....حلو الاعلان ده...حتجيبوا شوية عيال وعباطه

    يفلي فيهم.

    جيلان....بالظبط كده يامعلم وبعدين عباطه يطلع مش من

    جيبه...ويقول مافيش غير مش العياط سرح واتسبسب

    واكسره ع البلاط.

    ابو العريف...كده مش فاضل غير اعلان واحد.


    جيلان...شركة ظلاطا لشوي البطاطا.

    عباطه......وحعمل ايه في دي بقي.


    جيلان....ولا حاجه....حتاكل بطاطا لحد متزور وتقول انا

    انا مش حشبع من اكل البطاطا طول مافيه شركة

    ظلاطا.

    عجلان....واحنا مش حناكل معاه.

    ابو العريف....هو بنعمل حاجه غير الاكل...دااحنا فاكرين

    اننا اتخلقنا عشان ناكل وبس...ماتقلقش يامعلم

    البطاطا حتبقي كتير وتاكل لحد ماتشبع...احنا بتوع

    البطاطا.



    عجلان....ابقوا هاتوا شوالين معاكم.

    جيلان.....كده احنا متفقين.


    ابو العريف....حنمضي العقود امتي...؟

    جيلان....بكره حيجيكم ثلاث مندوبين من الشركات الثلاثه

    ومعاهم العقود..

    ابو العريف....كده اتفقنا.


    جيلان...(محدثه عباطه)....وانت يااستاذ عباطه..حنبعتلك عربيه من

    التلفزيون تجيبك لحد قناة الاحلام...(محدثه الجميع)..وكده وقتكم

    خلص معايا....باي...(تخرج جيلان)


    ابو العريف....شوفت يامعلم...مليون ونص في كلمه.


    عباطه...سيبك من الفلوس دلوقتي وتعالي علمني السواقه انا لحد

    دلوقت بوظت عربيتين.

    عجلان.....وانت تسوق ليه....هاتلك سواق يابخيل.

    عباطه....واجيب سواق ليه...يعني عاوزني افضل حمار..افرض

    رايح مشوار كده ولا كده...؟

    ابوالعريف....عادي قوي السواق يفضل معاك.


    عباطه....ويشوفني...؟

    ابو العريف.....لا يستناك

    عباطه...برضه حتعلم...في يوم ..في شهر...في سنه...انشاءالله اكسر مية عربيه

    عجلان.....اه ماهو الفلوس مابتتعبش فيها وبنلاقيها في الشارع عشان تكسر

    مية عربيه.

    عباطه....كل واحد حر في فلوسه...وانا اللي بجيب لكم الفلوس.

    عجلان...وانت لولايا يامعفن كنت بقيت كده...انت حتنسي نفسك ياولا

    انت مديون لقهوة حلبسه بحداشر جنيه.


    .

    عباطه...الواد حنكش سامحني فيهم...ارتاح انت بقي



    بلاك اوت

      الوقت/التاريخ الآن هو الجمعة مارس 29, 2024 9:14 am