اللوحه الثانية عشر
داخل شقة عباطه...في الصاله...
.......يدخل عباطه منتشيا وممسكا ببعض الجرائد في يده.
عباطه.....ياه فعلا العلم نور....دا الواحد كان حمار..(محدثا نفسه)
نقرا بقي ونشوف اخبار الدنيا.
اول خبر.....الفتنه الطائفيه تحرق الثوره....ياساتر يارب
هو احنا ناقصين...الكلام ده ممكن اصدقه في اي حته
الا عندنا...فيه ايه ياولاد مصر...نشوف خبر تاني
الاطباء مصرون علي الاضراب...والنبي ده كلام
رجال الجيش يحبطون محاوله لسرقة احد البنوك
ويتبادلون اطلاق الرصاص مع البلطجيه...والله
جيشنا كتر خيره...نشوف بره البلد احسن
الثوره تشتعل في سوريا بعد مقتل الطفل حمزه
الخطيب ومنظمات حقوق الانسان تدين العمليه
والتعذيب البشع الذي تعرض له الطفل...ايه اللي
بيحصل ده....دا احنا ماشوفناش في افلام الرعب
كده...هما اتسعروا كده ليه..واخدين منها ايه...
احنا كدنا ظلمنا دراكولا....نشوف غيره...العصيان
المدني يشمل كل محافظات اليمن....وبعدين بقي
نشوف غيره....الثوار في ليبيا يقتربون من طرابلس
....ايه الرعب ده...معقوله ...دي الغابه مافيهاش كده...يانهار اسود
..اهو ده عيب القرايه....دا الواحد يكون حمار احسن...ماهي دي
مش تصرفات بني ادمين...ينفع ارجع حمار وماافهمش احسن
...نشوف اخبار حد غيرنا...الرئيس اوباما يتعهد بتفوق اسرائيل
علي العرب ويعلن ان اعلان الدوله الفلسطينيه من جانب واحد
سوف يعرقل مسيرة السلام...(يضحك)....ههههههههههه حلوه
العالم دول بيستهيفونا....لا كده ماينفعش ..انا ارجع حمار احسن
بس ده مش حينفع..معقول ينفع ابقي حمار تاني..ولا استحمر
يادي النيله..(محدثا الجمهور)..ارجع حمار ولا استحمر.
(تدخل مايسه)
مايسه.....ايه الاخبار النهارده.
عباطه....زي الزفت...تصدقي لما كنت مابفهمش كنت
في نعمه...الجهل احسن.
مايسه....الجهل طول عمره مايكون احسن...الجهل ضعف
ياعباطه...قصدي يامحمود.
عباطه....منا عمال اقرا في الجرانين واتعكنن.
مايسه....تتعكنن من ايه...؟
عباطه....من اللي بيحصل في البلد وفي اليمن وليبيا
وسوريا..ولا امريكا اللي بتشتغلنا.
مايسه....عشان انت اتعلمت ابتديت تفهم...كنت الاول
بتسمع ومش فاهم.
عباطه....طول عمري بسمع ومش فاهم..لكن بالي
كان مرتاح ولكن دلوقت بتعب...؟
مايسه....عشان العلم حرك ضميرك..وخلاك تعرف
تفرق بين الغلط والصح....المهم عاوزه
اقولك خبر كويس..؟
عباطه...والله نفسي في خبر حلو...؟
مايسه....انا اتعينت مذيعه في قناه اسمها يالهوي.
عباطه....اسمها يالهوي....وانت حتلطمي فيها.
مايسه...(تضحك)...الطم ايه ياعباطه...دي قناه معروفه
وناجحه قوي...انا حعمل برنامج اسبوعي
اسمه فيس بوك.
عباطه....اه عارفه ...ودخلت فيه وتهت.
مايسه....كويس انا ليه صفحه فيه.
عباطه.....والبرنامج بتاعك ده حتعملي فيه ايه..؟
حناقش فيه الانترنت واثره ع المجتمعات
وانت من ضيوف اول حلقه.
عباطه.....موافق...اي حاجه معاكي موافق عليها...انا
مش عارف من غيرك كنت عملت ايه.
مايسه.....انا ما عملتش حاجه...وانت اللي ساعدت نفسك
وانا مبسوطه بيك اوي.
عباطه.....حقيقي مبسوطه بيه...؟
مايسه....طبعا....انت تستاهل كل خير.
عباطه...انا عاوز خير واحد بس..؟
مايسه.....ايه هو.....؟
عباطه...عاوزك ترضي عليا..
مايسه...(بخجل).....لسه شويه ياعباطه...ولسه قدامنا
كتير.
عباطه....فيه ايه تاني...؟
مايسه...عاوزه اشوف وصلت لفين في المزيكا
(تتجه لكاسيت وتضع اغنية اي دمعة حزن وتقوم
بتشغيل الكاسيت حتي الكوبليه الاول)
قول بقي ياعباطه.
عباطه....عاوزاني ااقول زيه.
مايسه...وفيها ايه...عبد الحليم بيغني طبيعي وبساطه قوي
وباحساس قوي.
عباطه...وانا حجيب الاحساس من فين....؟
مايسه....حاول بس....قول بقي الكوبليه الاول.
عباطه....احاول ايه...ده عاوز نفس كبير ..وانا ماعنديش.
مايسه.....حاول بس ....عشان خاطري.
عباطه....(يقلد عبد الحليم ويؤدي باسلوب ركيك)
مايسه....ايه ده....؟
عباطه....مش بقولك بلاش عبد الحليم...انا حغني للدكتور.
مايسه....دكتور مين....؟
عباطه...اللي بيقول...ايه اللي بيحصل ده...ايه اللي انا
مش واخد بالي منه ده.
مايسه.....اه تقصد حكيم...ده اسمه حكيم...مش دكتور.
عباطه....منا معرفش انه تمرجي ..افتكرته دكتور.
مايسه...بس حكيم لونه شعبي..؟
عباطه....اهو اي لون وخلاص.
مايسه....لا اللون ده ماينفعش معاك.
عباطه....خلاص حغني للواد المحترم...اللي اسمه ايه ده...؟
مايسه...مين المحترم ده...؟
عباطه....اللي دخل علي صاحبه وقله...السلام عليكم
وصاحبه قله السلام ورحمة الله وبركاته ورد عليه
وهو قاعد.
مايسه....مين اللي قاعد...؟
عباطه....صاحبه...رد السلام وهو قاعد....بس الواد اللي
بيغني عجبني...قله ...قوم اوقف وانت بتكلمني.
مايسه....اه تقصد بهاء سلطان.
عباطه...ايوه هو ده بهاء سمعان...بس ماعجبنيش في حاجه.
مايسه....ايه هيه..؟
عباطه....كان المفروض يشخط فيه وهو بيقوله قوم اوقف
وانت بتكلمني...مش يقولها وهو فرحان وبيرقص.
مايسه....برضه اسلوب بهاء سلطان مايمشيش معاك
ايه رايك في محمد فؤاد...؟
عباطه....لا بيغني وحش ومابحبش اسمعله.
مايسه.....وانت اسمعت له ايه بقي..؟
عباطه....مش هو اللي بيغني بوزعك...؟
مايسه....بوزعك ايه...؟
عباطه...(يغنيها)....بوزعك....اخر وزاع ...بوزعك.
مايسه....(تضحك)...اسمها بودعك....
عباطه...بودعك ولا بوزعك...كده كده..كل واحد رايح
في سكه ومش عاوز يشوف التاني.
(تدخل سعديه)
مايسه.....اهلا استاذه سعديه....
سعديه.....معلش اتأخرت عليكم شويه.
مايسه....المهم ايه اخبار مطربنا معاكي.
سعديه....هايل وحفظ معظم المقامات والحروف الموسيقيه
وبدربه علي سولفيج الصوت.
مايسه.....يعني فيه امل..؟
سعديه....طبعا....ده عنده استعداد غريب.
عباطه....ربنا يطمنك...طيب انا مش عارف اغني
لعبد الحليم ليه....؟
سعديه....كنت بتغني ايه....؟
مايسه....اي دمعة حزن.
سعديه...لا دي تعليمها صعب عليه دلوقت ..لكن حيتعلمها
واحده واحده..نعلمه الاغاني الهاديه الاول.
عباطه.....ربنا يخليك....ايوه كده .
(سعديه تمسك العود وتغني الكوبليه الاول في
اغنية في يوم من الايام)
في يوم من الايام ....كان ليه قلب
ويه المحبه هام....وياريت ماحب
قسوة حبايبي مغلباني
اوعي ياقلبي تحب تني
في يوم من الايام.
(تتوقف بعد الكوبليه الاول)....قول بقي
انت.
عباطه...(يردد الاغنيه بنشاذ)
سعديه....لا...انزل شويه وغنيها عادي وحاول
تطلع الكلام من جواك.
عباطه....من جوايا ازاي...؟
سعديه...تخيل حبيبتك قدامك...وحس بكل كلمه
حتلاقي احساسك بيخرج الكلام لوحده.
عباطه...(ينظر الي مايسه برومانسيه)....ويغني
الكوبليه بكفاءه عاليه.)..
مايسه...(تصفق.بحراره....برافو ...هايل يامحمود.
سعديه...ندخل ع الكوبليه التاني.
عباطه....(يغني الكوبليه الثاني والثالث حتي
وحياة حبك ياناسيني...ياريت
ياحبيبي انساك....دنا كل طريق
بعيوني ...علمته بذكري معاك.
مايسه...(بفرحه غير عاديه)....الله عليك ياعباطه.
سعديه...مش بقولك...عنده استعداد كبير...كده
نقدر نقدم عباطه للناس صح.
عباطه....وانا اول مره احس اني بغني.
مايسه....انشاء الله حتنجح ياحبيبي.
عباطه....بتقولي ايه....؟
مايسه...(يحر وجهها خجلا...وعباطه يقترب منها ويمسك يدها)
عباطه....والنبي قولتي ايه.
مايسه....قلت ياحبيبي.
عباطه...(يغني)....دي الكلمه اللي انا حاسس بيها
راح ادوب كل الشوق بيها....
وحقولها واعيدها واغنيها.
مايسه....انا بحبك يامحمود..؟
عباطه.(يغني)..حقول احبك...حقول احبك
واعيش احبك واموت احبك
مايسه....حقيقي يامحمود بتحبني.
عباطه...انا بموت فيك يامايسه..كنت ببصلك وكأني
ببص للسما وانا ع الارض...كنت بحلم بيك
من جوايا بس وكاتم كل احاسيسي
كنت بغير من عجلان ومن عادل واول مره احب
عادل لما فهمته ..بعد مامات شهيد واتمنيت اكون عادل.
مايسه...انت ماتقلش عن عادل في حاجه يامحمود.
عباطه.....من قلبك يامايسه...
مايسه....من قلبي يامحمود.
بلاااااااااااااااااااااااااك ااااااااااااااااااااااااوت
» تطبيق وصفات طبخ
» تفسير الاحلام كاملا بالحروف
» تطبيق وصفات طبيعية للتجميل
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية