مسرحية الخروج من الدائره 4

4 _ دع الأحزان تبكي من جبروت ابتسامتك.

اعلم بأنك بشر وانسان ومن حقك ان تبتسم ومن حقك ان تظل دموعك جافه انزلها واقع مرير
فلديك لسان ويدان وقدمان تستطيع ان تفعل بهم الكثير.
مهموم وشكري في المنظر
مهموم ياابني ارحم نفسك .فكر في بكره .
شكري النهارده وامبارح وبكره وبعد بكره مسروقين مننا يابابا .مش حعيش عشان اكل واشرب
انا انسان .
مهموم ياابني انا خايف عليك فوق بقي وعيش حياتك .
شكري مش عارف مين فينا اللي لازم يفوق يابا .
مهموم انت حتعملي زي الراجل العجوز .
شكري عجوز مين يابا .
مهموم واحد شوفته في الحلم وكأني شايفه قدامي وخايف تكون نهايتك زي نهايته .
شكري ونهايته ايه يابا .
مهموم عايش في الترب ومقاطع الناس ومتبهدل حاله وحتي اسمه نسيه .
شكري يكفي انه راضي عن نفسه يابا والله الواحد يتمني يعيش في صحرا
ولا غابه الواحد اكيد حيكون احسن .
( تدخل فضيله )
مهموم حمد الله علي السلامه ياهانم .
فضيله الله يسلمك ؟؟
شكري اخبار اجتماع المجلس ايه النهارده ياماما .
فضيله النهارده الاجتماع كان طويل اخد تلت ساعات .كان لازم ناخدوا قرارات مهمه.
مهموم المرأه محتاجه مجهودك ياحبيبتي .
شكري والمرأه في الريف بالذات محتاجه رعايه صحيه واجتماعيه واسريه .
مهموم والمطلقات ومشاكلهم والعنوسه وبلوتها الكبيره في المجتمع .
فضيله طبعا هم المرأه كبير اوي.
شكري ياريت ياماما تهتمي بمشكلة اعتقال النساء دي عار عليكم.
فضيله مافيش اعتقال ولا حاجه .دي اشاعات.
شكري ( ساخرا ) اشاعات .....كنتوا بتناقشوا انهي قضايا ياماما .
فضيله ناقشنا مشكلة الكلاب الضاله .( متأثره ) حاجه صعب لازم نشوفلها حل .
مهموم الله عليك يامراتي وعلي قلبك ...شايف امك وحنيتها.
شكري اه هي حنينه اوي .( محدثا امه ) وناقشتوا ايه تاني ياماما.
فضيله ناقشنا ارتفاع سعر طعام القطط والكلاب ..ايه ده جشاعه .
مهموم مالهمش حق ياحبيبتي وبعدين المصيبه بنستورد اكلهم .
فضيله عشان خدنا اخدنا قرار بضرورة التوسع في مصانع طعام القطط والكلاب .
شكري ( يبتسم ) وناقشتوا ايه تاني ياماما .
فضيله ناقشنا مشكلة خروف وعجل العيد .
مهموم اه والله ياشكري دي مشكله كبيره تستحق تتناقش.
شكري وايه المشكله اللي فيها يابابا .
مهموم المشكله اللي فيها ...( لا يجد اجابه ) اسأل امك مش هي اللي بتقول .
فضيله المشكله عدم مراعاة احساس الحيوان في الدبح .ينفع الخروف ولا العجل
يبقي شايف السكينه اللي حتدبحه .
مهموم لا ماينفعش طبعا لازم الجزار يسايسه ويخبي السكينه ورا ضهره .
فضيله احنا اقترحنا اننا نغمي راس الخروف او العجل او يدوله ابرة بنج قبل مايدبحوه .
مهموم صح ياحبيبتي والله انت نصيرة المرأه ياحياتي ...( محدثا شكري ) مش كده ياشكري .
شكري كده ونص يابابا .....اروح اطلع اوضتي احسن .(يخرج)
فضيله وانا كمان حطلع اغير هدومي وارتاح شويه ..وانت يامهموم خلي بالك .(تخرج)
مهموم حاضر ياحبيبتي .........انت اطلعي ريحي وماتقلقيش .؟

( تدخل اسراء )
اسراء بابا حبيبي.
مهموم اهلا ياحبيبتي ...اطلعي حصلي امك فوق .
اسراء لا ....انا حقعد معاك .
مهموم ماينفعش اصل الرقاصه نازله دلوقت .
اسراء وانا مالي تنزل ولا ماتنزلش.