ببساطه زمن عباطه...تأليف..سمير حمايه...(اللوحه السابعه)

اللوحه السابعه


داخل قناة الاحلان...حيث البرنامج الاسبوعي الاشاره الحمراء...مكتب علي شكل دائري

في منتصف المسرح..امامه اربع مقاعد...اضاءات مناسبه للحلقه...الخلفيات عباره

عن اشارات مرور حمراء...

( تدخل المذيعه جيلان فتحي ممسكه ببعض الاوراق ومحدثه المخرج المتواجد

في الكواليس....
جيلان......جاهز ياسعد..؟

صوت من الخارج...انا قربت اجهز

(يدخل عباطه منبهرا بالاستديو وغير مهتم بجيلان التي تبادره متحدثه)


جيلان.....بقولك ازيك يااستاذ عباطه...نورت التلفزيون.


عباطه...هو ده التلفزن.

جيلان...ايوه وبعد نص ساعه حانبقي ع الهوا.

عباطه...ع الهوا...ايه ده حنطيروا..؟

جيلان.....نطير ايه...حانبدأ البرنامج والناس كلها حتتفرج عليك.

عباطه...يتفرجوا عليا انا...ويشوفوني في قهوة حلبسه.

جيلان....كل الناس حتشوفك.

عباطه....واغيظ عجلان...


(يدخل الدكتور ناجي الفقي استاذ علم النفس)

دكتور ناجي...مساء الخير

جيلان...مساء الخير يادكتور...جيت في ميعادك بالظبط (جيلان تقدم له عباطه وعباطه

يمد يده ليسلم علي دكتور ناجي والدكتور ناجي يتجاهله)

دكتور ناجي..(ساخرا)...طبعا عارفه وعارفه كويس...



جيلان...(تشعر بالخجل وتقدم دكتور ناجي لعباطه)....الدكتور ناجي الفقي

دكتوراه في علم النفس.


عباطه...كويس والله...انا يادكتور صدري بيكتم عليا ..ماتيجي تكشف عليا

جيلان..( ضاحكه)...يكشف ايه عليك ياعباطه...ماينفعش.

عباطي...هو مش دكتور في النفس يعني يعرف في الانفاس والصدر.

جيلان....لا ياعباطه...ده دكتور اكاديمي مش طبيب صدر يعني

بيحلل النواحي السلوكيه للناس..


عباطه...كهربائي بنأدمين يعني.


جيلان...كهربائي ايه ياعباطه...الناحيه السلوكيه مالهاش علاقه

مالهاش علاقه بالاسلاك...يعني يقدر يحلل من كلام كل واحد فينا

شخصيته.


عباطه.....ويحلل ازاي..؟

دكتور ناجي... ماتستعجلش انا جاي مخصوص عشان احلل شخصيتك.


عباطه...جاي عشاني...الله يخليك..(محدثا جيلان)...والله باين عليه ابن حلال.


(يدخل عادل المطرب)

عادل.....مساء الخير عليكم.

عباطه....(مندهشا)....مين الواد عادل...(محدثا جيلان)...مين اللي جابه هنا.


جيلان...احنا استضفناه علشان البرنامج.

عباطه....ومالقيتوش غير ده تجيبوه.


جيلان...والله كنا حنستضيف الاستاذه مايسه ..لكن هي اللي رشحته(محدثه

عادل)....اتفضل يااستاذ.

(يجلس الجميع...دكتور ناجي علي يسار المذيعه وعباطه

الي يمينها وعادل يجلس بجوار دكتور ناجي)



جيلان....(محدثه المخرج)....جاهز ياسعد...


صوت من الكواليس....تمام انا جاهز...4...3

جيلان...استني اساوي شعري واظبط مكياجي (تهندم نفسها)

اوكيه ياسعد حابدأ.

الصوت....4..3...2..1

جيلان...سيداتي انساتي سادتي...اهلا ومرحب بيكم في برنامجنا

الاشاره حمراء..ويسرنا ان نستضيف في حلقة الليله نجم

النجوم وصاحب العشره مليون شريط..اللهم ما لا حسد ومعانا

دكتور ناجي الفقي استاذ علم النفس في جامعة السندباد ومعانا

المطرب....(محدثه المطرب)...اسمك ايه.

عادل....عادل محروص...

جيلان...اه المطرب عادل محروس....احنا حنبدأ بكام سؤال

بكام سؤال للضيوف وبعدين يسعدنا تلقي مكالمتكم

وسؤالنا الاول للنجم عباطه...(محدثه عباطه)...تفتكر

يااستاذ عباطه ظهورك فجأه وبيعك لعشره مليون شريط

دي ظاهره ولا كفاءه.

عباطه...(يظهر عليه الارتباك)....انا....

جيلان...اه ...انت ظهورك ظاهره ولا كفاءه.

عباطه...مش فاهم...ممكن تاخديني بالراحه.

جيلان...اخدك بالراحه ايه...انت طلوعك فجأه ده ظاهره

ولا كفاءه.

دكتورناجي...طبعا ظاهره ومش محتاجه كلام.

جيلان....موافق ع الكلام ده ياعباطه.

عباطه..(فرحا بهروبه من السؤال)....اه...الراجل ده باين عليه

ابن حلال...روح ياشيخ ربنا يخليلك امك.

جيلان..(محدثه عادل)....والاستاذ عادل رأيه ايه.




عادل...........انا بضم صوتي مع دكتور ناجي...هي فعلا ظاهره وللأسف.

عباطه...(محدثا جيلان)....بيتكلم كويس ولا قال حاجه غلط...؟

جيلان...قال ان رأيه زي الدكتور ناجي.

عباطه....ماشي...يعني مغلطش.

جيلان..(محدثه عباطه)...بس النقاد يااستاذ عباطه قالوا عليك انك لا

مطرب ولا مغني ولا ليك صله بالغني خالص.

عباطه...مين اللي قال كده...؟

جيلان....النقاد..؟

عباطه...نكاد مين....اللي بينكدوا ع الناس..

جيلان...نكد ايه ياعباطه...النقاد دول اللي بيكتبوا عن الاعمال.

عباطه...بيسحروا يعني.

جيلان...لا...دول اللي يقولوا العمل ده كويس ولا وحش.

عباطه....بيفكوا الحجاب يعني والعمل. صح.

جيلان..لا..مش صح...دول اللي بيقولوا ده بيغني حلو ولا بيغني وحش.

عباطه...وقالوا ايه عليا بقي...؟

جيلان....قالوا انك مش بتاع غني والغني مش بتاعك.

عباطه...يعني انا مش بتاع غني...؟

جيلان...هما اللي بيقولوا كده..؟

عباطه...ابقي بتاع فول وطعميه...ياستي..انا شرايطي ماليه البلد

والناس خدتها واللي مش عاجبه يروح يلمها.

دكتور ناجي...مش كل الناس اشترت شرايطك...انا مااستنضفش اشتريها.

عباطه.......عنك مااشتريته...وبناقص من العشره جنيه بتوعك كأني شحت

شريط.

جيلان..(محدثه عادل).....وانت يااستاذ عادل ايه رايك في الشريط

عادل...الشريط فاضي...لا طرب ولا كلمات ولا لحن.

عباطه....(محدثا جيلان )....بيقول كلام حلو.

جيلان....لا...ده كلام وحش خالص...بيقول ان شريطك فاضي



مالهوش لازمه.

عباطه....(ساخرا)...ده قصر ديل....الواد ده بيغير مني وبياكل ضرب

في الافراح...والناس بتقول علي صوته وحش (محدثا عادل)..صح

ياولا...جاي تقول علي شريطي وحش والله لافضحك واهل الحاره

تلاقيهم شايفين كل حاجه.

دكتو ناجي...(محدثا جيلان)....بزمتك فيه اغنيه يبقي اسمها ملوخيه.

عباطه....مش عاجبك الملوخيه عشان اكلت الناس الغلابه...طيب كنت

فين لما قالوا مكرونا.

دكتورناجي...اسمها ماكرنا ياجاهل.

عباطه..(يسخر منه)....اسمها ماكرنا...اه ...انا جاهل...ماكرنا..ماهو مكركم

باين..

جيلان...ودلوقت ياجماعه نهدا شويه عشان نتلقي مكالمات الجمهور.

صوت من الخارج...هيفاء حسين رابعه تجاره.

جيلان...اهلا وسهلا بيكي.

الصوت...في الحقيقه انا مش عاجبني اسلوب دكتور ناجي ولا استاذ عادل

في الكلام عن عباطه..انا واحده من ملايين المعجبين بيه

ومابسمعش غيره وبرقص كمان علي كل اغانيه.

عباطه..(فرحا)...ينصر دينك والنبي تغيظيهم شويه وتفلفليهم يا

(محدثا جيلان)...هيه اسمها ايه...؟

جيلان...اسمها هيفاء

عباطه...اه...والنبي تغيظيهم يا...(يتلعثم)..يا..يا اللي كنتي بتتكلمي

من شويه....(يغني)...كايده العزال انا من يومي..ايوه اه.

جيلان...شكرا هيفاء...(محدثه المخرج)...اه راحي.

الصوت...راجي جلال ياافندم.

جيلان...اه اهلا وسهلا استاذ راجي

الصوت...انا عاوز افهم حاجه...انتوا نازلين سلخ في عباطه

واحد بايع عشره مليون شريط ومكسر الدنيا عاوزين



منه ايه...يبطل غني عشان ترتاحوا..(محدثا عباطه)..يااستاذ

عباطه كلنا بنحبك.

عباطه....وانا والله بحبك وبكره الاتنين دول (مشيرا الي ناجي وعادل)

(يغني)...قاعدين ليه ماتقوموا تروحوا....ع القهاوي واسرحوا

في الشوارع وانبحوا.

جيلان....ودلوقت نسمع المكالمه الاخيره.

الصوت...ياسر الدوكش صحفي في جريدة حارتنا.

جيلان...اهلا بيك استاذ ياسر...اتفضل.

الصحفي...انا مع الدكتور ناجي والاستاذ عادل...عباطه ظاهره سوده.

عباطه....الله يسودوا عيشتك يابعيد.

جيلان....(محدثه عباطه)....خليه يكمل كلامه يااستاذ.

الصوت...بقولك ياافندم عباطه ظاهره سوده ع المجتمع والنوعيات اللي

بتسمعه مش مثقفه وفكرهم سطحي..هما لو عندهم ذوق يسمعوا

لصوت واحد زي ده.

عباطه....اللي بيسمعوني احسن منك..وانا مين بيسمعلي مش ولادكم

ولا بجيب سميعه من الشارع..تقدر تقولي سمعت شريطي ازاي..؟

الصوت....سمعته بالصدفه مع اولادي.

عباطه...وعملت معاهم ايه...؟

الصوت....شخط فيهم وكسرت الشريط.

عباطه...تبقي نفعتني واشتروا شريط تاني ياريت كل مايجيبوا شريط

تبقي تكسره.

جيلان....احنا كده ياجماعه حنخرج من الوقت المحدد للبرنامج

شكرا استاذ ياسر...فيه مكالمه تاني

الصوت...اميره حسن.

جيلان...اهلا اميره اتفضلي قدامك خمس ثواني.

الصوت...بسأل الاستاذ عباطه...اغنية الملوخيه مين مؤلفها.

عباطه...ماحدش بلفها ولا حاجه.



جيلان....قصدها تقولك مين اللي كتب الكلام بتاع اغنية الملوخيه.

عباطه....اه....الاستاذه مايصه...


جيلان...شكرا اميره...ودلوقتي جه وقت الاشاره الحمراء

وحنسمع الاتنين النجم الكبير عباطه والاستاذ عادل

(محدثه عادل)....حتسمعنا ايه النهارده في الحلقه يااستاذ

عادل.

عادل...حقول موعود...(يمسك العود ويغني الكوبليه الاول من موعود

موعود معايا بالعذاب موعود ياقلبي

ولا بيتهدا ولا بترتاح في يوم ياقلبي.

دكتور ناجي..(يصفق بحراره)...الله ..الله عليك ياابني.

عباطه...(ساخرا)....الله علي ايه...عاجبك ابو قلب موجوع ده.

عادل ...(يكمل الكوبليه)...وعمرك...عمرك ماشفت معايا فرح

كل مره...ترجع المشوار بجرح

والنهارده جاي تقولي ياللا بينا ننسي الاهات

جاي تقولي ياللا بينا الحب فات

وميل وفرش منديله كاتب علي طرفه اجيله

وامانه يادنيا امانه...تاخدينا للفرحه امانه.

عباطه...ياخي ياخدك ربنا وماتفرح ابدا (يقلده في اخر الكوبليه)

دكتور ناجي..(يصفق)...عظيم ياابني..(محدثا جيلان)

شوفتي الصوت...صوت يتسمع فيه طرب

عباطه...(ساخرا)...والنعمه ماحد فاهم حاجه...حوريكم الغني


(يقوم عباطه ويغني اغنية الملوخيه ويتجاوب معه

الجمهور بجنون...حتي ينتهي بتصفيق حاد

جيلان...كده الجمهور كله معاك ياعباطه.

دكتور ناجي...وللأسف.

جيلان...الموضوع اذواق يادكتور ناجي وكل واحد فينا



له ذوقه وفكره وميوله...ومايقدرش طرف يفرض

ذوقه علي الطرف التاني...وبكده وصلنا لنهاية حلقة الليله

ومعادنا الشهر القادم مع نجم جديد وحلقه جديده من

الاشاره الحمراء


بلاك اوت