اللوحه التاسعه
داخل شركة الانتاج
(ابو العريف يتحد ث مع عجلان في الهاتف)
ابو العريف....ماتقلقش يامعلم..كله حيكون تمام وهرفع راسك قدام
الحزب كله...ايه...روايح..اه انا بعتلها وتلاقيه في
الطريق...اوكيه منا ماتوصل حتكون جات.
(يدخل الساعي عثمان)
عثمان....نجيب ينسون بالحليب
ابوالعريف....اه يبقي فيه حد بره...قول وخلصني
عثمان...فيه واحد ست راجل..
ابوالعريف....ست وراجل...(يحدث نفسه)...مين دول
شكلهم ايه الست والراجل دول.
عثمان....لا هما واحد...واحد ست راجل.
ابو العريف...اه تبقي روايح يامنيل خليها تدخل.
(تدخل روايح ويخرج عثمان)
روايح....اهلا يااسمك ايه...؟
ابو العريف...اهلا وسهلا بالست روايح كبيرة حارة السد.
روايح...اه ادخل في عبي ياواد وقرطسني...انا كبيرة
حارة السد..؟
ابو العريف....اه انت الكبيره هو فيه حاجه في الحاره
ماتعديش عليك.
ابو العريف...سيبك من الاونطه اللي ماتدخلش عليا
المعلم الكبير فين..من ساعت مانجح
ماشفتوش.
ابو العريف..(ساخرا)...نجح ايه ياروايح ماالدنيا اتنيلت
بستين نيله والمعلم بيندب ع الفلوس
اللي صرفها.
روايح...ماهو حيعمل قديهم مية مره .عليا انا الكلام
ده ياواد.
ابو العريف...كان حيعمل...لكن ياعالم حيلحق يعمل
ولا لا...المهم احنا عاوزينك في شغله كبيره
روايح....مش فاضيه.
ابو العريف ..(ساخرا)...ليه وراكي ايه انشاء الله.
روايح....عندي لجان شعبيه.
ابو العريف...وانت كمان بتعملي لجنه..؟
روايح ...اه انا لجنه عشره في الحاره.
ابو العريف...عشر لجان في الحاره.
روايح ...اه ...كل خمسه متر لجنه.
ابو العريف...سيبك من اللجان واسمعيني وركزي
قوي ...الموضوع كبير.
روايح....مش حتدفعوا...؟
ابو العريف...طبعا..هو انتي بتعملي حاجه لله
انتي زي المنشار طالع واكل ونازل
واكل.
روايح.. بطل قر يافقري..وقول عاوزين ايه .ماهو انتوا
الواحد مابيشفش خلقتكم الا لما تكونوا
عاوزين حاجه.
ابو العريف....ماشي يا روايح...مقبوله منك.بصي ياستي
احنا عاوزينك تلمي كل الألاديش بتوعك
بتوع حارة السد والحارات اللي جنبيها
وكل اللي تعرفيهم.
روايح....اه وبعدين...؟
ابو العريف...حتاخديهم وتطلعي ع الميدان وتروحوا
تضربوا شوية العيال دول وتقعدوا مكانهم.
روايح..(تضحك ساخره)...نضرب...نضرب مين.؟...انت
مابتسمعش قناة الحصيره بيقولوا فوق المليون.
ابو العريف....لا انا بسمع قنواتنا بس هي بس اللي
بتجيب الحقيقه...وطول النهار جايبين
كوبري الميدان فاضي.
روايح ....والميدان وتحت الكوبري.
ابوالعريف...لا الكاميرات بتاعتنا مابتنزلش تحت
دايما تجيب من فوق...واللي تحت
بيقولوا عليهم كام الف مابيزدوش غير
يوم الجمعه....المهم انكم تطلعوهم
وخلاص...ازاي مااعرفش.
روايح....طيب واذا ما قدرناش يافالح نطلعهم.
ابو العريف....تقسموا معاهم الميدان..هما ياخدوا
نص وانتوا تاخدوا نص..ماهو الميدان
ملك لكل الشعب ومش بتاعهم لوحدهم.
الميدان بتاعنا كلنا...وبكده ماحدش من بره
حيقدر يتكلم.حتبقي ظاهره صحيه..الرأي
والرأي الأخر.
روايح....مش فاهمه.
ابو العريف....يعني هما يقولوا يسقط النظام واحنا
يعيش النظام.
روايح....بس الموضوع ده خطر قوي وعاوز تفكير.
ابو العريف...مافيش وقت للتفكير..حديكي خمسمية
جنيه علي كل راس في اليوم..ماتقلقيش
الحزب حاطط تقله كله في الموضوع..ماهو
الاولاد دول لو نجحوا..كلنا خنروح في داهيه
ومش حتقوم لنا قومه تاني ..فاهمه.
(يدخل عجلان)
عجلان......كويس انك هنا ياروايح..؟
روايح....وانا اقدر اتأخر عنك يامعلم..دا انت جمايلك
مغرقاني وعرقك لسه في هدومي(تقترب
منه)...ونفسك في كل حته في الشقه
لكن بقينا دلوقتي مش قد المقام.
ابوالعريف..(ساخرا)....هي كانت بتورد لك لحمه
يامعلم.
روايح....كان بيموت في لحمتي...نفسي
في الاكل حلو...مش كده يامعلم..؟
عجلان...اه...لحمه وقيع...انت مش شايف
يابني..؟
روايح....فشر..انا عندي لحمه وقيع ...خليني
ساكته (هامسه لعجلان)..ااقوله انك
ماتعرفش تدبح .
عجلان ....انا مابعرفش ادبح...؟
روايح....اه...اخرك تعاين وتتفرج بس..؟
عجلان...مالوش لازمه الكلام ده يافضايح.
روايح....طيب اسكت وخليني ساكته..؟
عجلان....حسكت .حسكت خالص.
ابو العريف...خلونا في الشغل ..بكره يمكن لا
نشوف لحمه ولا حتي عضم.
عجلان....اه معاك حق...خلينا في الشغل.
ابو العريف...فهمتي حتعملي ايه ياروايح..؟
روايح.... اه فهمت حنقعدوا في نص الميدان
لكن حنبات زييهم...؟
ابو العريف...اه تباتوا زيهم...وماتقلقيش من حاجه
حنعملكم خيم ونديكم بطاطين.
روايح......وعاوزين حمامات..؟
ابو العريف....حنعملكم حمامات سوبر لوكس.
روايح....وعاوزين مناشر غسيل.
ابو العريف....حنعملكم كل حاجه
عجلان...انا مش غايظني غير العشره مليون اللي
صرفتهم...حاتنقط عليهم.
روايح.....قلبي عندك يامعلم ...معلش...ده حال الدنيا.
عجلان....حال الدنيا اتلخبط ياروايح...انا مش قادر اصدق
دنا سمعت كمان انهم عاوزين يشيلوا الريس.
روايح....اه....ماهو القوالب نامت والنصاص قامت.
ابو العريف....ما حدش قادر عليهم يامعلم وخلاص الزمام
فلت....دا الشرطه اللي مايقدرهاش غير
ربنا .خلعوا وسابوا الكل يخبط في بعضه.
روايح....ماتقلقش يامعلم...وراك رجاله...انا حخليلك
الميدان حريقه.
عجلان....اه والنبي ياروايح ..لو قدرتي تولعي فيهم
ولعي...عاوز الميدان فحمه...دول عشره
مليون صارفهم.
(يدخل عباطه والجميع في سكون تام)
عباطه....مالكم....فيه ايه...ايه ياجماعه ولا اللي
قاعدين في ميتم.
عجلان....هو فيه ميتم ووقف حال زي اللي احنا فيه.
عباطه..(ينظر الي روايح ويتحدث ساخرا)..اهلا بالست
فضايح..قصدي روايح.
روايح...(ساخره)...اهلا يامدهول والله نضفنا اهو
خلاص علينا وبقينا فوق.
عباطه...وجوزك فوزي لسه برضه بياخد علقه
كل يوم.
عجلان...انا سمعت انه متلقح في الميدان مع
الواد عادل.
روايح....اه...اتلم المتعوس علي خايب الرجا..
وياريت هما بس...دي الحاره كلها في
الميدان والواد حنكش عامل برنيكة شاي
واللي عامل عربية كبده وحمص شام وحلاق
ومكوجي...الميدان بقي سوق كبير يامعلم.
ابو العريف...وطبعا انتي لما تاخدي الاديشك وتقعدوا
في نص الميدان حتقلبي عيشك.
روايح....اه...وشرفك حأجر بالمتر.
ابو العريف...طيب اتكلي انتي دلوقت .عشان تلحقي
تظبطي نفسك...الليله لازم تكونوا بايتين
في الميدان.
(تخرج روايح)
عباطه....الليله حيباتوا في الميدان...هو انتوا اتقلبتوا
ولا ايه...؟
ابو العريف....اتقلبنا ازاي...؟
عباطه......مش انتوا كنتوا بتقولوا العيال دول وحشين
وبيخربوا في البلد..
ابو العريف...اه...وحشين...ووحشين قوي كمان.
عباطه....طيب حتروحوا الميدان ليه..؟
ابو العريف...عشان نعمل مجموعه مضاده ليهم.
عباطه....اقطع دراعي مافاهم حاجه.
ابو العريف...بص ياعباطه..الوضع في البلد بقي خطير
قوي...واديك شايف وقف حالنا وحال البلد
كله واقف...الناس مش لاقيه تاكل.
عباطه....والناس لما هيه مش لاقيه تاكل سايبنهم ليه؟
ابو العريف...مش عارف....ماعندهمش نظر..غاويين فقر
خلينا في دورك يامطرب يافنان...البلد محتاجالك.
عباطه...محتاجالي انا..؟
ابو العريف....وجه الوقت اللي لازم تدي فيه مصر.
عباطه...وماله ادييها...اديها ونص...مااديهاش ليه ...بس
مصر حتحتاج عباطه في ايه.
ابو العريف...تديها صوتك...؟
عباطه....ومصر حتعمل ايه بصوتي...؟
ابو العريف...انت ممكن تعمل شغل حلو قوي...ومصر تتبسط منك.
عباطه......وانا نفسي ابسط مصر...لكن حبسطها ازاي...؟
ابو العريف...انت حتروح حارة السد وطبعا حيتلم حواليك
اهل الحاره زي العاده.
عباطه....اه...
ابو العريف...وانا حكلملك المذيعه صاحبتنا وحاتيجي
اتصور وانت تقول كلمتين حلوين في حق الريس.
عباطه...كلمتين حلويين زي ايه....؟
عجلان...قول الريس مشبعنا لحمه.
ابو العريف..(ساخرا)....لحمة ايه يامعلم..قول ان الريس
بقاله تلاتين سنه معانا وماشفناش منه حاجه
وحشه...والناس مبسوطه بيه وفرحانه.
عجلان....اه..قول الريس منضفنا اول باول..ومابيهنش
عليه يشوفنا في زحمه...كل شويه يعملنا
كوبري...شبعنا كباري .
عباطه...معاك حق يامعلم..طول عمره مهيصنا ومرقصنا.
ابو العريف...وطبعا الحلقه اللي حتسجلها في الحاره
حتتذاع في كل الفضائيات وانت شعبيتك
مش شويه.
عجلان...عفارم عليك ياحلال العقد.
بلاك اوت
» تطبيق وصفات طبخ
» تفسير الاحلام كاملا بالحروف
» تطبيق وصفات طبيعية للتجميل
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية