اللوحه الثالثه
في الصاله....يدخل يوسف الي الصاله بعد ان قام من نومه
يفرك في عينيه...ينظر الي الساعه المعلقه علي الحائط
يوسف...........ياه الساعه احداشر ماما قدامها اكتر من ثلاث ساعات
(ينظر الي المائده المتوسطه لفوتيه الصالون فيجد طبق
عليه سندوتشين ...يتجه الي السندوتشات بسعاده)
(يحدث نفسه بصوت عالي)...أمي ماتنساش حاجه ابدا
(يمسك بساندوتش ويجلس علي احد كراسي الفوتيه)
اللعبه صباح الخير.......؟
يوسف (تعلوه الدهشه وينظر حوله ثن يهز رأسه قانعا نفسه بالتهيؤات
يستمر في تناول الساندوتش)
اللعبه صباح الخير يايوسف...
يوسف (يسيطر عليه الخوف ويبدأ يمضغ ببطء وناظرا للعبه بخوف)
اللعبه انا بصبح عليك يايوسف ..مابتردش عليا ليه.........؟
يوسف (يبلع الطعام بصعوبه وينظر للعبه في خوف)
(يتلعثم وهو يتحدث) انت بتكلميني انا.
اللعبه ايوه...هو فيه حد غيرك هنا....
يوسف (يسيطر عليه الرعب)...انا انا
اللعبه ايوه انت ومتخافش...قرب مني انا صاحبك.
يوسف (وهو في قمة الرعب) صاحبي ولا صاحبتي
انت مش لعبه واسمك نانا.
اللعبه لا...انا مش نانا ...انا عملت عشان مامتك تصدق اني لعبه.
يوسف يعني انت مش لعبه.
اللعبه لا طبعا....هو فيه لعبه تاخد وتدي معاك كده.
يوسف طيب انت ايه (وهو في قمة الرعب)
اللعبه انا روح....
يوسف روح ...روح ايه ...الروح اللي بتطلع من الناس لما تموت.
اللعبه لا............انا روح من الجن..........
يوسف (وهويتهته ويتلعثم من شدة الخوف) روح من الجن ..يعني ايه
عفريت يعني.
اللعبه ايوه ....انا عفريت من الجن
يوسف انت عفريت (يغمي عليه علي الكرسي)
اللعبه (تنزل من علي الكرسي وتتجه نحو يوسف)
يوسف يوسف متخافش مني
انا صاحبك. (وبعد تكرار المحاوله بين تفتيح يوسف
واغمائته كل مره)
يوسف (وهو في قمة الرعب) ابعدي عني...انا عاوز ماما
انا حروح لماما.
اللعبه متخفش مني يايوسف ...انا م حأذيك.
يوسف انت عاوزه مني ايه...؟
اللعبه عاوزاك توعدني اننا نبقي صحاب وماحدش يعرف
اللي بينا.
يوسف انا مش فاهم..........
اللعبه يعني قدام الناس انا لعبه وقدامك انت احنا اتنين
صحاب ...تساعدني واساعدك.
يوسف تساعدني ازاي وانا اقدر اساعدك ازاي.
اللعبه حساعدك في المذاكره واخليك تطلع الاول ومش حخلي حد
يقدر يقرب منك ولا يأذيك.
يوسف ولا يؤذي ماما...
اللعبه ماشي ولا يؤذي ماما كمان.
يوسف وانا اساعدك ازاي.
اللعبه مش عاوز منك غير انك تكون صاحبي..انا عايش وحيد
وهربان من اهلي.
يوسف هو انت كمان باباك ساب امك.
اللعبه لا بس بابا وحش وشرير وكل عيلتي من العفاريت.
يوسف وباباك شغال أيه.............؟
اللعبه شغال مؤذي.
يوسف مؤذي يعني ايه ...انا بابا بيشتغل في الفاكهه تاجر فاكهه
انت باباك بيبيع ولا بيشتغل ايه.
اللعبه بابا مابيبعش حاجه ولا شغال حاجه هو عفريت وبس.
يوسف يعني بيشتغل عفريت وبس..........؟
اللعبه اه ....شغلته عفريت.
يوسف وبيأكلكم ويشربكم من فين.
اللعبه احنا مخلوقات غيركم وبناكل من بواقي اكلكم
يوسف يعني مابتشتغلوش خالص......؟
اللعبه لا.............
يوسف وعايشين ليه ...............؟
اللعبه عشان نؤذيكم وبس.
يوسف وتؤذونا ليه وانتوا بتاكلوا اكلنا..
اللعبه عشان دي شغلتنا...ربنا خلق الملايكه للخير
وخلقنا للشر وانتوا بين الخير والشر.
يوسف يعني انتوا ماتعرفوش غير الشر.
اللعبه هأ هأ ...
يوسف بتضحك ليه............؟
اللعبه عشان انتوا بقيتوا اشر مننا...انا عشت مع اهلي
الشريرين وعشت وسطيكم ومالقيتش فرق
ويمكن تكونوا انتوا اشر مننا....العفريت مننا بياخد الواحد
منكم للخماره لحد الباب ويتكسف يدخل...لكن انتوا ابالسه
العفريت بيغويكم علي الحرام والقتل والظلم والسرقه وساعة
التنفيذ يوقف يتفرج وانتوا بجحين وقادرين علي كل
حاجه.
يوسف وليه انتوا بتوقعونا في الغلط...........؟
اللعبه وانتوا ليه بتسمعوا كلامنا وبتنسوا كلام اللي خلقكم.
يوسف يعني انت مابتعملش زييهم
اللعبه لا انا تبت لربنا وبقيت بصلي وعاوز اكفر عن ذنوبي
وياريت تساعدني.
يوسف اساعدك ازاي...........؟
اللعبه حفهمك بس قبل ما افهمك لازم تعرف قصة الخير
والشر. من البدايه.
يوسف حتقولي حدوته...............؟
اللعبه اه حقولك حدوتة الخير والشر...ربنا لما خلق ادم وامر الملايكه بالسجود
ليه.....ابليس مارضيش يسجد له وعصي امر ربنا
يوسف ابليس هو الشيطان ...مش كده.
اللعبه اه هو الشيطان والملك بتاعنا. وهو بيكرهكم وبيحقد عليكم.
يوسف يكرهنا ليه ...احنا عملنا له ايه...؟
اللعبه وامك عملت لابوك ايه...والمسروق عمل للسارق ايه
والمظلوم عمل للظالم ايه....ابليس حقد علي مخلوق غيره
ما انتوا كمان بتحقدوا علي بعض وبتكرهوا بعض وضيعتوا
انسانيتكم....النمل بيتعاون مع بعضه...لكن انتوا لا...عمرك شوفت
نمله بتتعارك مع نمله.
يوسف خلينا في حدوتة ابليس...........
اللعبه ربنا لما خلق ادم دخله الجنه وقاله كل من كل حاجه ونهاه عن شجره
واحده بس من نعيم ماتقدرش تعده داخل الجنه...اشجار وقصور
ماشافتهاش العين.....وطبعا المفروض شجره واحده ماتمثلش
مشكله لادم...........يعني تخيل لو اخدتك في جنينه كبيره قوي
وفيها اشجار رومان ومنجه وجوافه وكل الفاكهه وقلتلك بلاش تاكل
بلاش تاكل من شجره واحده.
يوسف بناقص منها طبعا الشجره دي.
اللعبه ابليس فضل ورا ادم لحد ماخلاه اكل منها.
يوسف وهو سمع كلام ابليس ليه ونسي كلام ربنا.
اللعبه عشان ابليس عمله غسيل مخ وبهره بسحر الجنه
والخلود لحد ماغيب ادم عن التفكير وراح سامع كلامه
بعد ماسكر عقله هو وحواء.
يوسف راحوا واكلين من الشجره علي طول.
اللعبه ايوه ولقيوا نفسيهم عريانين ملط ومالقوش حاجه
تسترهم وبقيوا يغطوا عوراتهم باوراق الشجر.
يوسف وربنا طبعا زعل منهم.
اللعبه طبعا وده حال اللي ينسي ربنا....عشان كده انتوا
بتعملوا زي اللي عمله ابوكم ادم وبتعيدوه وبتاكلوا
من الشجره وبقيتوا زي ابوكم ادم عرايا مش لاقيين
هو اكل من شجرة الجنه وانتم تأكلون من شجرة الدنيا
يوسف بس احنا لابسين هدوم.
اللعبه ياابني الهدوم بتستر عورات الجسد....لكن قلوبكم وعقولكم
عريانه مش لاقيه اللي يسترها...اتعريتوا من الحب والفضيله
وكل قيمه انسانيه حلوه....حتي الهدوم اللي بتتكلم عليها
ماعادتش تستر اجسادكم وكأنكم في سبق عرايا.
يوسف فهمني..........ابليس خلا ادم وحوا ياكلوا من شجرة الجنه
فهمني ازاي خلانا ناكل من شجرة الدنيا.
اللعبه تعالي معايا الحجره اللي جوه دي (ويشير الي حجره يسار
المسرح) وانا حفهمك.
بلاك اوت
» تطبيق وصفات طبخ
» تفسير الاحلام كاملا بالحروف
» تطبيق وصفات طبيعية للتجميل
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية