182
_ منا ليه قلب ومابيعرفش حاجه.
_ لما تعشقي ياحليمه ، حتلاقيه يقول لوحده.
_ ياميت ندامه ، أعشق مين ؟ خلف الملا ؟
لواحظ تضحك.
..........
في الدرب يسير الشيخ أدم بصحبة إبنه شحاته في الطريق لدكان سعد
الخياط .
_ حنوصلوا ياواد ياشحاته لدكان سعد الخياط .
تلاقيه خلص الجلبيتين وبعده نطلوا ع الجامع
يادوب نلحق صلاة الظهر.
_ ماشي يابا ، يارب يكون خلصهم
علشان ألبس الجلبيه.
_ لا ياابن عزيزه ، أنت حتقيس الجلابيه
عند سعد ولو طلعت تمام، تشيلها حتى
العيد يابن عزيزه ولا عاوز تغرمني جلبيه تاني.
183
لا مفتح ياواد زي أمك عزيزة.
الشيخ أدم يشم رائحة الطشه وهو يسير مع شحاته،فيتوقف ليستمتع
براحتها وهي في الغالب شوربة يضاف عليها ثوم يتم تحميرة
وتكون بصحبة دجاجة محمرة ،أما اللحوم فهي تُطبخ على زفر
في برام كبير مملوء بالسمن والبصل ويقلبونه بيد يسمونها
مُفراك يُنعمون به البصل ويُقلبونه وهي أكله في غاية الدسامة
لا تتحملها معدة أهل المدينة.
_ شامم ياواد ياشحاته رائحة الطشه، دي مسلوقه
مُعتبره ، ياترى طالعه من بيت مين الطشه دي.
_إحنا قدام بيت الزغبي.
_صحيح ياواد ياشحاته، ماهي الطشه دي
ماتطلعش من أي بيت وماتتاكل إلا عند جدك الزغبى.
184
36_ حجرة ليله داخل دار اللزي
الكثير من الأسرار تكون مخبئة في سراديب الذكرى، هي تحاول
أن تخُفي الكثير من دمعات الوجع والشوق والألم ،الضحكات تتوه
من وجهها وتحاول القبض عليها ، تستدعي الخيال المهاجر بعيد
تتوه بين الكيد وابواب الذكرى.تحدث نفسها.وقرينها يرد عليها
_ أنت جيت ياسديري
_ أيوه ياليله ، جاي هلكان وجعان
عاوز أكل لُقمه من إيدك الحلوة.
_ قبل ما أحضرلك الغدا ، أقعد جنبي
هنا ، عاوزه أمَلِي عيني منك، يوم
كامل ماشفتكش فيه ياسديري.
أنت طالع من الفجر وحشتني قوي.
_ أنت مابتغبيش عني ياليله
وأنا ماسك الطوريه وأعزق في الأرض
وأنا بدور البداله وبسقى الزرع ، شايفك
قدامي .
....منيرة متجهة للزير لتشرب وأثناء عودتها بالقرب من حجرة ليله
185
تسمع صوت ليله ، فتقترب من الحجرة لتتصنت عليها.
تتسحب على أطراف أصابعها حتى تلتصق بباب الحجرة.
تسمع .
_ مالك عرقان كده ، تعالى انشفلك وشك
قرب عليه يابُعد عمري.
...منيرة في دهشة والمفاجأة هزتها
_ إخص عليك يالزي ، هي حصلت كده
تُفجري قبل ماتتجوزيه.
تتجه منيره ناحية حجرتها.
_ أعمل أيه ، أروح أفتح عليهم وأفضحهم.
بس لو عملت كده ، اللزي كان يقطع رقبتي.
.. تسمع منيره صوت اللزي ينادي عليها ، دهشه وحيرة تنتابها
صوت اللزي
_ بت يامنيره.
تحدث نفسها
_ فيه حد بينادي يامنيره.
اللزي بصوت أجش وعالى.
186
منيره تقتلها المفاجأة بعد أن تتبين أن هذا الصوت صوت اللزي .
_ ده صوت أخويه اللزي ، امال يكون مين جوه
مش ممكن يكون لحق يطلع من عندها.
تتجه نحو حجرة أخيها اللزي وتفتح الباب وتدخل الحجرة، تجد اللزي
مستلقياً على فراشه بملابسه الداخلية ، سديري وسروال كبير
منيرة في دهشة وحيرة وتوتر ، مفاجأت غريبه وألغاز أمامها بلا حل.
_أيه يابت بنده عليك م الصبح ، مش سامعاني.
منيرة وهي لاتزال في ذهولها.
_ أنت ماطلعتش من هنا ؟
_ أيه يابت ، فيه أيه؟
_يعني أنت ماقمتش ولا رحت عند ليله؟
_لا ، انت اتخبلتي ، منا قدامك أهو لسه صاحي.
_ تبقى هي بتتحدت مع مين ؟
_مين اللي بتتحدت مع مين ، حترويشيني.
_ ليله كانت بتكلم واحد في الأوضه ، وتقوله
تعالى أنشفلك وشك يابُعد عمري.
_ أيه الكلام الماسخ اللي بتقوليه ده؟
186
_ أنا سمعت الكلام ده بوداني وأنا رايحه
أملا السطل من الزير أشرب.
يقوم اللزي فزعاً من فراشه ويحمل بندقيته في يده ، يتجه بملابسه الداخلية
نحو حجرة ليله وخلفه منيره وهي تستعد للشماته في ليله.
.. ليله تستلقي على فراشها محدثه نفسها
_ تعالى نام جنبي ياحبيبي وارتاح ، أنت شقيان طول النهار.
تُغمض ليله عينيها، اللزي يندفع نحو حجرتها ، يفتح الباب ويدخل غاضباً
وخلفه منيره ، يجد ليله نائمة ، يصوب البندقيه ناحيتها وهو يشدها ، تقوم ليله مفزوعه.
_ فيه أيه ؟
اللزي بغضب
_ بتعملي أيه ؟
_ أعمل أيه ، أنت مش دخلت لقيتني
مخموده ونايمه.
_ نايمه من ميته ؟
_ من بدري .
منيره
187
_ كدابه ، كنت صاحيه دلوقتي وكنت بتتحددتي مع حد.
_ أتحدث مع مين ياحسره، ومين حيقدر يدخل يتحدت معاي.
اللزي يعود إليه الهدوء.
_ بصحيح ، مين يستجري يدخل هنا.
يلتفت لمنيره
_ باين عليك اتخبلتي ، ليه حساب معاك.
يلتفت نحو ليله
_ معلش ياليله ، امسحي فيه الغلطه دي
تقعدي باالعافيه .
ينظر اللزي بإحتقار لمنيره وهو يخرج من الحجرة وتتبعه منيرة
منكسرة وهي تنظر لليله بغيظ وليله تبتسم في شماته، يعود اللزي
لفراشه ، يستلقي على سريره.
_ أعمل أيه تاني أكتر من اللي بعمله معاك ياليله
أجيب أبوكي وأخوكي من فين ؟ ياريت أقدر أجيبهم.
..........
188
منازع يسير متخفياً قاصداً دار اللزي يحمل بندقيته في يده ، يصل باب الدار، يجد بكر يقوم بغفارة الدار ، بكر ترتعد فرائصه عندما يرى منازع
_ اللزي جوه ياد.
بكر وهو يرتعش
_ أيوه جوه،دخل الدار من بدري ، أخبطلك عليه؟
_ أنا اللي حخبط عليه ، وغور أنت بعيد.
بكر وهو يرتعش ويتلعثم
_ لازم أنا أديله خبر، عشان مايضرنيش.
منازع بغضب
_ قولتلك غور أنت .
منازع يطرق الباب
............
اللزي يقوم من على فراشه مُنزعجاً.
_ يوه ، الواحد مايعرفش يرتاح شويه .
يخرج من غرفته ويتجه نحو الباب ، لايزال منازع يطرق على الباب
189
اللزي يصرخ بصوت عالي
_ طيب ياللي بتخبط.
يفتح اللزي الباب فيجد منازع أمامه.
_ منازع !
_ طيب سيبني أدخل .
_ اتفضل يامنازع ، ماهو الخبط ده مايكُنش وراه غيرك.
_ كويس إنك لسه فاكر خبطتي.
يتجه اللزي بمنازع إلى الداخل حتى يصلان غرفة الجلوس.يرحب
اللزي بمنازع الذي يجلس .
_ بيتك ومطرحك يامنازع ، حروح ألبس جلابيه وأجيلك.
_ مالوش لزوم ، أنا مش غريب.
_ مرتاح في المغاره.
_ واخد على كده ، جعفر وهارون عاملين أيه..؟
_ كويسين وكانوا معايه الصبح عند نخلات مُصبح
_ وأيه اللي خلى جعفر يروح هناك .
_ سعل علينا ، قالوله أني وهارون هناك.
_ يبقى بتفكروا في مصيبه؟
190
_ هي من ناحية مصيبة ، هي مصيبه
ومصيبه كبيره كمان على
أهل البلد .
_مصيبة أيه دي ؟
_جعفر حيقسم الأرض ويبيعها كلها للأشراف
_ عمل خير ، بلا أرض بلا نيله.
_ معاك حق تقول كده ، ماأنت بعت خمس فدادين
بوكلة مفروكه (هي عجينه يتم عجنها والدبدبة فوقها
حتى تُصبح فطيرة ولكن بسمك أكبر من ثلاثة لخمسة سم
يتم وضعها على النار دقائق قليلة قبل أن تبدأ الدخول في الحَمَار
ثم يتم تقطيعها باليد لقطع صغيرة ويتم فركها بكمية كبيرة من السمن
البلدي ، ثم يتناولونها بالجبنة القديمة أو العسل الأسود)
_ يعني الخمس فدادين كانوا أرضي ، قولي ايه
أخبارك ؟ وموضوع ليله اللي سمعته ، هي
لسه معصلجه معاك .
_ حتى أنت عرفت حكاية ليله يامنازع.
_ هو فيه حاجه في البلد دي بتستخبى.
_ تاعبه قلبي يامنازع ، بس حنت شويه دلوقت.
191
_ حنت ؟ حنت إزاي ؟
_وافقت على الجواز ، بس بعد موافقة أبوها وأخوها.
_تبقى ساهله خالص ، مش حيقدروا يقولوا لا .
_ وهما فين ، دول قاعدين مع حسن ، وحسن
مش عارف أعتر فيه.
_ حسن أنا حجيبلك قراره ، يعني لو
خلصنا من حسن يبقى أحسن.
_حتبقى كل حاجه اتسهلت وسهل امسك الحمداني
وابنه وانت كمان يامنازع لو عترت فيهم قولي.
_ أيه حتخلص عليهم.
_ لا ، دول مايتخفش منهم، أرجعهم البلد واتجوز ليله.
منازع يهم بالوقوف للخروج والعودة للجبل.
_ مالسه بدري.
_ بدري من عمرك ، حروح أريح شويه
والصبح حقلب الجبل على حسن .
_ ياريت تيجيني بخبره.
_ حجيبلك خبره وماتستعجلش، بس أعتر فيه.
192
اللزي ساخراً
_ أبقى خلي بالك من الديابه؟
منازع يضحك ببرود
_ قولهم بس هما يخلوا بالهم مني ، تقعد بالعافية
_ الله يعافيك.
يخرج منازع ويبدأ رحلة العودة إلى الجبل، يسير عبر الدرب قاصداً
الجبل ، الكلاب لا تكف عن النباح عليه طوال الطريق ،حتى ترك الدرب
وبدأ السير في طريق الصحراء.
........
في الجبل أمام الخيمة
في كل ليلة ، خصوصية عذبة يُحبها حسن ، يجمع شتات قلبه المُثقل بحب
عُذري، يعاني من فوبيا البُعاد ، الوجع يسكن قلبه ولا يستكين ، يُنصت لذاكرة
الحنين المملوؤة بصخب الذكرى، هو مجبور على التناغم مع الليل ، والعزف
على أوتاره ، يجلس حسن بصحبة حمدان ومرسال.
حمدان
193
_ مش حتقوم تريحلك شويه ياحسن.
_ لا ، أدخل أنت ريح وخد مرسال أحسن باين عليه تعبان.
وأنا حقعد استنى منازع.
_ أدخل أنت وأنا حستناه.
_ عاوز اقعد مع نفسي شويه ، ادخلوا أنتم.
مرسال
_ مش عاوز مننا حاجه .
_ لا ادخلوا ريحوا
يدخل حمدان وخلفه مرسال الخيمة ويبقى حسن في وحدته يفكر في لواحظ ويحدث نفسه .
_ آه يالواحظ ، لو أطول أخدك وأبعد بعيد.
يلوم نفسه.
_ تروح فين ياحسن والناس الغلابه دول
حتسيبهم لمين ، دول حطوا كل أملهم عليك
آه ياحسن إتكتب عليك الوجع على كل حته من جتتك.
قطع تفكير حسن وصول منازع ، الذي يبدو عليه التعب
جلس بجوار حسن .
194
_اتعوقت عليك مش كده.
_ أنا قاعد مستنيك ، حمدالله بسلامتك.
_ الله يسلمك من كل ردي.
_أيه ؟ البلد أخبارها أيه ؟
_ البلد حالها ملخبط وربنا يستر.
_ليه ؟ فيه أيه ؟
_جعفر ناوي يقسم كل الأرض ويقطعها
حتت ويبيعها للأشراف .
_ دي مصيبه .
_ مصيبه كبيره، أهل البلد يروحوا فين .
_ دول مالهمش في حاجه غير الفلاحه والزراعة.
_ كمان اللي حيشتري مش محتاجهم، عنده ناسه
وأهل بلده .
_ يعني كده بيضيقوا على أهل البلد وبيسدوا
آخر منفس ليهم ، دول حيموتوا من الجوع
_ أيوه ، ربنا يستر.
_ ماسمعتش يامنازع حاجه عن ليله.
195
_ أنا رُحت دار اللزي علشان كده، بيقول كويسه
وبدت تحن عليه وتعامله كويس ، وبيقول هي
وافقت على الزواج ، بس شارطه إن أبوها وأخوها
كمان يوافقوا.
_ اللزي قلك كده.
_ أيوه
_ طيب قوم ريحلك شويه تلاقيك تعبان .
196
36_ صلوات باكية
نحتاج أن نفر إلى الله، حين تئن النفس ، وينزف القلب من جراء ألم
تُخلفه قسوة الأيام ، وترمينا بدموع، نخاطب من خلالها الزمن فلا يُجيب
تنساب ُ من مُقْلِنا حتى تَخترقُ القلب بوجع يمتزج بأوردته وشرايينه،حتى
نشعر بضيق رحلة الحياة ونرى أشباح الموت تتخطفنا .
صباح يوم الأحد ، أرمنيوس يركب حماره وخلفه يشعه في الطريق
للصلاة في الدير الموجود بمنطقة تُسمى عرب الدير وهي على بُعد
حوالي خمسة كيلو مترات من الحاجر يمر الطريق بنزلة الحامديه
ونزلة الحرادنه ، ثم بعد مايقرب من اتنيل ميل عرب الدير
_ مش كنت رحت وحدي يايشعه.
_ محتاجه أصلي يابا ، بقالي كتير مارحتش الدير.
_ كنت تقعدي مع اختك مريم ، بدل ماسايبينها لوحديها.
_ مريم راجل يابا وهي لما شافتني عاوزه أصلي قالت ماشي
روحي صلي أنت المره دي ، وأنا حروح المره اللي جايه.
... وصل أرمنيوس كوبري خشبي من جذوع النخيل أعلى الترعة
يربط بين البلدة والجسر ، يسمونه الفِلْقَه ، وهي مشتقه من كلمة فلق
وهي جذوع نخيل مفلوقة إلى نصفين ، ما إن بدأ أرمنيوس بالإنحراف
197
بحماره علي يسار الجسر ، حتى قطع طريقه هارون.
_ على فين يامقدس؟
_ النهارده الأحد رايح الدير أصلي ، بلاش دي كمان.
_تكونوا هنا قبل المغرب ، لو بعده ماتجوش أحسن.
يشعه معترضه
_ وأنت مالك بينا ، نيجوا براحتنا ، نيجوا المغرب
ولا نقعد لليل مالكش دعوه.
ارمنيوس
_ إستني أنت يايشعه .
يلتفت لهارون .
_ ماشي ياهارون ، حنرجع قبل المغرب.
_ أنت حتمشي كلامه يابا.
هارون بحدة
_ لمي لسانك يابت .
يلتفت نحو ارمنيوس
_روح ياخويا وزي ماقولتلك.
يبدأ ارمنيوس السير على الجسر ويشعه لم يعجبها ماحدث.
198
_ ماكنش لازم توطيله كده يابا.
_ مش مستاهله يابنتي ، احنا رايحيين وحنرجع
قبل المغرب ، حنعملنا حكايه ليه ؟
............
صعب أن لا نستوعب مايحيط بنا من مشاكل، ويصير السقوط متكرراً
في حياتنا ، نشعر بثُقل الحياة ،تُنهك قوانا وتُمطرنا بالخيبات تزاد وتتسع
وتتوحش يوماً بعد يوم ، يجب أن نكون في حذر وترقُب ولا نترك أنفسنا
عُرضة للريح .
..داخل المغارة في دائرة خُماسية يجلس حسن ومنازع والحمداني وحمدان
ومرسال .
حسن يلتفت للحمداني.
_ شُفت جعفر ناوي على أيه ياعم حمداني ؟
_ خير يابني .
حسن يلتفت نحو منازع
_ قولهم يامنازع .
199
_ جعفر حيقسم كل الأرض ويقطعها حتت
وحيبيعها للأشراف .
حمدان بغضب
_ وأهل البلد يروحوا فين ؟
_ يتولاهم ربنا .
حمدان
_ لا كده اللي بيحصل كتير قوي
ومايتسكتش عليه .
حسن
_ مش حنُسكت ياحمدان ، ولازم نفكر بالراحه
وحنلاقي حل إن شاء الله.
مرسال
_ جعفر كده بينتقم من أهل البلد كلهم
ماتيجوا نخلصوا عليه ونرتاح.
يلتفت إليه حسن
_ إحنا مابنقتلش حد يامرسال .
_ واشمعنى هو بيقتل في الناس، ورجالته
200
السبب في موت أبويه وموت أمي بقهرتها عليه.
_ أبوك مااتقتلش يامرسال.
_ لكن هم سبب موته ، هو راجل كبير ومش حمل بهدله.
الحمداني
_ إهدا يامرسال يابني ، خلينا نفكر بالراحه.
يلتفت الحمداني نحو منازع.
_ ماسمعتش حاجه عن ليله بنتي يامنازع؟
_ليله بخير ياحمداني ، واللزي بيعاملها كويس
وخصوصاً بعد ماوافقت ع الجواز، بس
اشترطت توافق أنت وحمدان .
حمدان
_ ده بُعده ، لو شاف حلمة ودنه،وبعدين
هي ازاي تقوله موافقه .
حسن
_ وهي حتقدر تعمل ايه ياحمدان
ليله بتحاول تمشي أمورها.
منازع
201
_ ولو وافقتم اللزي حيرجعكم البلد وكمان
حيديكم دار بدل من اللي إتحرقت.
حسن يلتفت لحمداني
_ بقولك أيه ياعم حمداني؟
_ قول ياحسن ياابني ؟
_ اسمعنى كويس ، أنت ممكن ترجع البلد
أنت وحمدان ،واللزي كده مش حيضُركم
وبالعكس حيفرج برجوعكم، هو كان عاوز
ليله ، وليله تحت إيده ، ولو وافقتم على
الجواز ، حتعيشوا مرتاحين .
منازع
_ ايوه صح ، هو قال كده.
حمدان معترضاً على كلام حسن.
_ أنت بتقول أيه ياحسن ! بلد أيه اللي نرجعها؟
_ أنا بتكللم عشانكم ياعمي ، وعلشان راحتكم
202
وبهدلتكم هنا ، أنا مش بتخلى عنكم ، بفكر
فيكم مش في نفسي.
الحمداني
_ إن كنا إحنا تعبنا وأحنا أصحاب المشكلة
أنت تبقى أيه ياللي تعبت معانا ومالكش في
التور ولا الطحين ووقفت جنبينا برجوله
ومن غير مصلحه.
منازع
_ كلام الحمداني صح ياحسن ، اللي اتعمل
في الحمداني وأهله مش شويه ، وعاجبني
كلام حمدان .
حمدان
_ حسن إحنا على الخير والشر مع بعض
ده آخر الكلام عندي .
حسن يلتفت لمنازع
_ ركز معايه يامنازع ، الحمل اللي جاي
حيبقى تقيل أوي عليك .
203
_ وأنا قدها وقدود وماتعولش هم ياحسن.
_ أنت حتنزلهم كتير ، وتخليك وراهم ،عاوزين
نعرف كل حاجه عن الأرض ومين حشتريها
من الأشراف وامتى حيجي يشتري.
_ دي ساهله خالص.
_ سيب الباقي على الله وعليه .
.......
عندما يخشع القلب لله ويزرف الدموع فرحاً وتَضرعاً،يشعر
براحه وطمأنينه فالله أقرب إليه من روحه ، من أنفاسه
دمعة خشية الله خفيفة وجميلة تختلف عن أي دمعة، تنساب
بروحانية ، تحتوي كل الهم ، كل الوجع ، تُضمد الجراح
هي أعظم دمعة.
... أرمنيوس يصل بحمارته إلى الدير ، ينزل من الحمارة
ويقوم بإنزل يشعه، يقوم بربط الحمارة بقدميها الأماميتين .
_ بينا يابنتي .
204
دير كبير مبني بالطوب اللبن ، يُحيطُ به سور بإرتفاع صغير
لا يتعدى المتر ونصف ، هو ومريم يؤديان صلاة التثليث
ويتجهان إلى داخل الدير، جاوزا الممر ، دخلا من الباب، هو باب
خشبي كبير أعلاه صليب ، له مزلاج ضخم، يوجد فوق السطح عمود
خشبي معلق عليه جرس الكنيسة ، داخل الدير قاعة كبيرة ، تُزينها
الصلبان من كل جانب وصور كثيرة ، معلقة على جدران القاعة
مقاعد عبارة عن مدادات خشبية كبيرة بقدر مساحة الصالة ، تواجه
مصطبة كبيرة يقيم عليها القسيس صلواته وترانيمه ، يدخل ارمنيوس
وخلفه يشعه ، يصلبان على صدرهما، القس يجلس على المصطبة
وصلوا إلى مصطبة القس من خلال ممر بين المدادات الخشبية
قَبلَ ارمنيوس يد القس وصلب على صدره وتبعته يشعه، قام أرمنيوس
ومعه يشعه بأداء الصلاة والقس يتابعهما ، إنتهيا من الصلاة .
القس لأرمنيوس
_ مالك يابني حزين ، وكأنك تحمل كل هموم العالم .
_ الأيام بقت مابترحمش ياأبونا، حبستنا في سكه ضلمه
حجبت عننا نور الشمس ، حتى الهواء أتملا تراب
وعفر وشوشنا .
205
•
• _ وَقَالَ الرَّبُّ: «سِمْعَانُ سِمْعَانُ هُوَذَا الشَّيْطَانُ طَلَبَكُمْ لِكَيْ يُغَرْبِلَكُمْ كَالْحِنْطَةِ! وَلَكِنِّي طَلَبْتُ مِنْ أَجْلِكَ لِكَيْ لاَ يَفْنَى إِيمَانُكَ. وَأَنْتَ مَتَى رَجَعْتَ ثَبِّتْ إِخْوَتَكَ». - لوقا 22: 31, 32
_ الحياه مرها أكثر من حلوها ، كتير بتبكينا وقليل
بتفرحنا ، بتاخد مننا وتبخل تدينا.
• _ وَأَمَّا أَنْتَ فَمَتَى صَلَّيْتَ فَادْخُلْ إِلَى مِخْدَعِكَ وَأَغْلِقْ بَابَكَ وَصَلِّ إِلَى أَبِيكَ الَّذِي فِي الْخَفَاءِ. فَأَبُوكَ الَّذِي يَرَى فِي الْخَفَاءِ يُجَازِيكَ عَلاَنِيَةً. وَحِينَمَا تُصَلُّونَ لاَ تُكَرِّرُوا الْكَلاَمَ بَاطِلاً كَالأُمَمِ فَإِنَّهُمْ يَظُنُّونَ أَنَّهُ بِكَثْرَةِ كَلاَمِهِمْ يُسْتَجَابُ لَهُمْ. - متى 6: 6, 7
يابني إن الحج إلى هيكل سليمان ، يمكنه غسل
الخطايا ، ولكن لا يشفي القلب المملوء بالخطايا
206
إن الرب لا يهمه صيامنا ولا صلاتنا ، إن الرب
يُحب أن نؤمن جميعاً، لنصبر على الحياة الدنيوية
لنعيش الحياه الأبدية .
_ قُم صلي لربك وأدعوه ليستجيب لك وليخفف عنك.
يقوم ارمنيوس ويشعه بالصلوات لوقت كبير ، ثم ينتهيان.
_ حاسس أني ارتحت شويه يابنتي.
_ وانا كمان يابا حاسه أني غسلت كل الوجع اللي جوايه.
_ بينا نرجع يابنتي ، يادوب نوصل قبل ماتُغرب الشمس.
207
................
جميل أن يكون لك إنسان أنت نبضه وهو نبضك ،ينشغل بك ، يخاف عليك
يُشعرك بقيمة الحياة، يرعاك حتى ولو من بعيد ، يُحسن الظن بك ، يراك
غير كل البشر، يغفر لك إن أخطأت ، يلتمس العذر إن أسأت إليه،الحب دنيا بلا كراهية ، تتوحد فيها القلوب والأرواح والعقول.
...لواحظ بصحبة حليمه في حديقة القصر ، مُنذ أن فكرت في إرسال خطاب
لحسن وهي لم تهدأ ، كتبت الخطاب وتنتظر من يحمله ، لا يوجد أمامها سوى السلوتي وتمنت لو إنطلقت وسط الدروب وكل مكان بحثاً عنه، المكان
المفضل للسلوتي عند الطاحونة ، يحرس الحمير ويساعد في رفع شوال الدقيق على الحمارة كمساعدة يجد من وراءها بارة أو يجري مستقبلاً
الآتي بحمل الغلال في أشولة يسمونها تِليس ويساعده في نقل الغلال إلى الداخل وهذا العمل يقوم به رجل يسمي محمد رزق ، قصير القامة، صاحب بدن سمين وعينان لا يتلاقيان أبدً بحوله واضحه ، محمد رزق ولو أنه يضيق
من السلوتي من مشاركته في رزقه ،إلا أنه يحتاجه عندما يكون هناك زحام
فهو حارس جيد للحمير. الطاحونة من الداخل عبارة عن قمعان كبيران
تُصب فيهما الغلال ،مرتكزتان على حجرين من الصوان يدوران أسفل القمعين وهناك فتحة ينزل منها الدقيق مثبت عليها نفس شوال القمح الذي تم سكبه في القمع ، يعود هذا الشوال لفتحة الدقيق يستقبل الغلال المطحونة
208
يعمل في الطاحونة ثلاثة أفراد من الداخل ، أحدهما يصُب الغلال في القمعين
والآخر يستقبل الدقيق والثالث يراقب ماكينة تشغيل الطاحونة وتزيتها
أما محمد رزق شيال الطاحونة ، فرزقه على مايهبه الطاحن.
_ لسه مش لاقيه السلوتي ياحليمه .
_ ياستي السلوتي عامل زي الهوا ماتعرفيش تمسكيه.
_ معلش عشان خاطري ياحليمه.
_ أنا عارفه أجلي حيكون عليك، حروح ع الطاحونه ، النهاردة
الطاحونه زحمه وممكن ألاقيه هناك ، هو بيحب الحمير والنهارده
عيده .
_ روحي بُصي عليه ولو لقتيه ، هاتيه وتعالي.
حليمة ساخرة
_ أجي ، أجي فين ؟ أنا لو لقيته حبعتهولك وارجع بيتنا.
_ ماشي ياخوافه.
_ حروح على هناك دلوقت وأمري لله .
تخرج حليمه مسرعة فيوقفها مهران غفير الدار بتطفل ، محاولاً
معاكستها.
_ لسه بدري ياحليمه .
203
_ بدري من عمرك ياخويه.
يقترب منها وينظر لها نظرات إعجاب.
_فيه أيه ياواد ؟
_ أنا باتحدت معاك يابت .
_ وتتحدت معايه ليه ، كنت من بقية أهلي.
_ ياريت نبقوا أهل ونلم زيتنا في دقيقنا.
حليمه لا تثق في نوايا مهران ، هو لا يريد زواج ويبحث عن علاقة
وهو يستضعفها وتعلم العادات والتقاليد وأنها إبنة طواب وهي
مهنة مصنفة من العبودية وإستحالة أن يفكر فيها كزوجة.
تحدثه بعنف.
_ بقولك أيه ، مش ناقصاك ، ولِم روحك ولا عاوزني
أدخل أقول للست لواحظ إنك بتغتت عليه كل ماباجي.
_ لا ، على أيه ،روحي يابت شوفي حالك.
ربنا يوقف حالك .
حليمه غاضبة .
_ يوقف حالك أنت وأهلك يابعيد، مش فاضيالك
ياغراب البين .
210
...........
هناك قلوب بروح الملائكة، ألوانها لون الأشجار، أحلامها بصفاء
السماء ، قلوبها بنقاء الماء، خيالها بإتساع الكون والفضاء، لا يصافحون
خنجر الغدر ، وهناك قلوب ترعرعت في حجر الشيطان ، قلوب بلون
الجحيم ، لاترى سوى في الظلام ، وبصرها يخشى ضوء النهار.
... أسفل الجميزة يجلس عبدالمتجلي الحلاق وأمامه بكر أحد رجال
اللزي ، يقوم بالحلاقة لبكر .
_ ماتشيلها بالموس وتريحني يامجلي ( يختصر عبد المتجلي)
_ انت وراك حاجه .
_ خلصني ، اللزي زمانه صحى وحيجي
علشان نلحقوا جناب الملتزم وهارون في الأبعادية.
_ ومن امتى جناب الملتزم بينزل ويروح الأبعادية
أول مره يروح هناك .
_ ماهو حيقسم الأرض ، علشان يبيعها.
_ أنهى أرض ، أرض الأبعادية .
_ لا حيبيع كل الأرض مش الابعاديه بس.
_ والناس اللي بتزرع حيروحوا فين ؟
211
_ يروحوا مطرح مايروحوا ،أوعى تجيب
سيرة بالكلام ده لحد ، والله أقطع خبرك.
_ وأنا أقدر أجيب سيره .
ينتهي عبدالمتجلي من الحلاقة وينتفض بكر ويمشي حتى دون أن يشكره.
.............
عند الطاحونة
مثل السوق ، أوناس تدخل حاملة الغلال وآخرون يخرجون بحميرهم
محملة بأشولة الدقيق ، السلوتي يلهو داخل حوش الحمير،سمح له محمد
رزق بالعودة بعد أن تعهد أن لا يعود لفعلته الشنعاء الشاذة مع إحدى
الحمير وكان محمد رزق قد ضبطه وهو يرتكب هذا الفعل الشاذ وأشبعه
ضرباً ،لكن منذ أن عفا عليه وسمح له بالعودة لم يفكر في إرتكاب
هذا الفعل الشاذ.
... تصل حليمه للطاحونة وتقترب من محمد رزق وهو يرفع
شوال دقيق ويضعه على الحماره ، الجو ملبد بغباء أبيض كثيف
يخرج من داخل الطاحونة، حليمه لمحمد رزق.
_ماشُفتش الواد السلوتي يارزق.
212
_ أيه مايكنش سرق حمارتكم.
_ السلوتي مابيسرقش يارزق ، ماتعرفش هو فين ؟
_ حتلاقيه مرزوع جوه في حوش الحمير.
أنت عاوزاه في أيه ؟
_ وأنت مالك أنت .
تتجه حليمه نحو حوش الحمير وتجد السلوتي يتحدث معها.
_ أنت هنا ياحزين وأنا بدور عليك.
_ أيه يابت ياحليمه ، عاوزه مني أيه؟
حليمه ساخرة
_ وأنا حعوزك في أيه يافقري.
الست لواحظ هي اللي عاوزاك.
الفرحه تغطي وجه السلوتي عندما سمع بلواحظ
_ عاوزاني بجد.
_ أيوه .
_ حاخد الحماره واروح.
213
_ لا اجري وشوفها الأول وأهي حمارتك مربوطه هنا.
_ ماشي
ينطلق السلوتي مسرعاً نحو قصر جعفر وتخرج خلفه حليمه من الحوش.
214
37_ الأبعادية
لأهل الشر طقوس غريبة ، ملونة بالدم ، إعتادوا اللعب مع الشيطان
والشيطان يزين لهم كل ألعاب الشر حتى أدمنوها ، يكررون الأخطاء
ولا يعبأون ، يدوسون الضمير ، وقلوبهم عنه غافلون.
.. داخل جنينة جعفر على طريق الأبعادية ، هارون وجعفر تحت ظل أشجار
الجنينة .
_ بقالك كتير ماجتش الجنينه.
_من زمان ياهارون ، خلينا في المهم
أنت عملت أيه ؟
_ كله تمام جنابك ، قسمت الحيازه كلها لعشر
حتت ، كل حته فيهم مية فدان .
_ يعني كل حته مية فدان ؟
_ أيوه والعشر حتت هم الأبعاديه والزنقور
والظهورات ،والخور وعون والجرف والكتره
والعبله والفراسيه والكتكاته.
215
_ عفارم عليك ياهارون ، أنت كده فهمت
أنا عاوز أيه .
_ حروح بكره ساقلته وأعرضها على ملتزم الأشراف
واللي يجي يشتري ، إحنا مستنيين.
يدخل اللزي وخلفه بكر
_ اتعوقت عليكم ، مش كده ؟
جعفر
_ هو أنت فاضيلنا يالزي .
_ قِستوا الأرض ؟
هارون
_ وقسمناها كمان وخلصنا يالزي .
.........
في الجبل
حسن يحب أن يمسك بالبدايات ، يرفض النهايات المرعبة والتي
تأتي محملة بالمفاجآت ،يتحايل على الواقع بحلم مُمسك بإرادة
حديدية ، حسن واقفاً مع منازع أسفل تبة الجبل .
216
_ أنا حنزل البلد ياحسن ، حشوف جعفر
عمل أيه في قسمة الأرض، علشان النهاردة
نزلوا يقيسوها .
_ أيوه خليك متابع موضوع الأرض كويس
دي أهم حاجه ، تعرف مين حيشتري
وامتى حيشتري ، فاهم يامنازع.
_ حقولك كل حاجه ، وأنا عارف مين
يقدر يشتري الأرض .
_ تفتكر مين يامنازع.
_ مايقدرش على حيازه كبيره زي
دي غير واحد زي معتصم.
_ مين معتصم ده ؟
_راجل غني من أشراف ساقلته وإخميم.
وهو بيحب يلم الحيازات ، شكلك ناوي.
على نية كبيره ، مش كده ياحسن .
_ كده يامنازع ، حاخد حقي وظلمي بحكم ظالم وأخد بحق
بحق أرمنيوس وسديري ورحان وحق كل أهل البلد.
يتبع 7 والاخير
» تطبيق وصفات طبخ
» تفسير الاحلام كاملا بالحروف
» تطبيق وصفات طبيعية للتجميل
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية