اللوحه الثامنه
داخل حارة السد...عدد قليل من الماره...
(حنكش يقف امام القهوه....يدخل جعلص)
جعلص....تعرف ياواد ياحنكش لو ايامنا كلها انتخابات...مش حنلاقي
واحد فقير في البلد.
حنكش...والله معاك حق ياجعلص ..الناس هاصت لحمه وفلوس
ولا كأننا في عيد.
جعلص...بصراحه ...المعلم عجلان ظبط الحاره...اصل الفقر
وحش ياحنكش...تعرف ياواد البرشامه اللي فرقها
المعلم عجلان عملت شغل جامد قوي معايا...
حنكش ...هي عملت شغل معاك انت بس...عملت شغل
مع رجالة الحاره كلها...الرجاله بتوع الحاره
طلعوا تعبانين قوي ياجعلص.
جعلص...بيني مابينك كتر خير نسوان الحاره..الفقر منيم
حال رجالتها...الرجاله مش عارفه تقف علي رجليها
حنكش....لا اتكلم علي نفسك انت بس..انا بخير وجامد قوي
جعلص ...يعني ما اخدتش البرشامه ياواد...؟
حنكش....لا اخدتها...عشان اجربها بس.
جعلص..... وحسيت بالفرق..؟
حنكش...(بحماس قوي)....اه طبعا فرق كبير قوي.
(يقل من حماسه كاذبا)...يعني عادي.
(يدخل فوزي)
فوزي...اشكي لمين ياربي..انت المنتقم الجبار.
جعلص...فيه ايه تاني يافوزي....؟
فوزي...قولولي ياناس...قولولي ياخلق..اعمل ايه معاها
البنت ضاعت..والود حيضيع...حيتعود يبقي..؟
حنكش...ماتطلقها وتريح نفسك..؟
فوزي...لو طلقتها حتاخد الشقه...والعيال...وكمان المعاش.
دي كرشتني م البيت.من يوم الانتخابات.
جعلص...تلاقي المعلم عجلان ظبطها ع الاخر.
فوزي....من ناحية اتظبطت هي اتظبطت جامد.من
المعلم عجلان واتظبطت م القسم..دي كانت بتقبض
ع الراس مية جنيه..
حنكش...روايح مولعاها مولعاها في البيت وبره البيت
وكل الحملقيه والصيع بتوعها...هو حد اتظبط اديهم.
جعلص...معاك حق ياواد ياحنكش...البلطجيه اكتر ناس
استفادوا....دا الواحد فيهم وصلت يوميته
لربعمية جنيه.
حنكش...جاتنا نيله في حظنا الهباب واحنا فرحانين
بكيلو لحمه مستورده وبرشامه.وطبعا المعلم
عجلان مش حنشوف خلقته بعد مانجح.
جعلص...بعد عمين طويل انشاء الله نبقي نقابله بعد
اربع سنين.
فوزي...انا سمعت ان فيه قلق جامد علي الانتخابات دي
بيقولوا عليها مزوره.
حنكش....وايه الجديد...عادي..احنا شوية خرفان بتتساق وبس
..ياعم اربط الحمار مطرح مايعوز صاحبه
وهما صحاب البلد...اهل عز.
(يدخل عادل)
عادل....عاجبكم اللي حصل في الانتخابات ده.
حنكش...خير يااستاذ عادل حصل ايه..؟
عادل ...التزوير والرشاوي...؟
حنكش...ياعم واحنا مالنا....؟
عادل...مالكم ازاي...امال مال مين...البلد مش بلدكم
مش بتحلموا بهوا نظيف.
جعلص...هو نظيف...هما واخدين الهوا النظيف والفرح
كله والسرور وكل واحد فيهم شريف ونزيه
ورشيد...احنا ولاد الايه...البلد بلدهم ياعم
واحنا ضيوف عليهم...وبقالنا تلاتين سنه
في حمد وحسن وبركه وحنخلص سنين البركه
وندخل علي سنين الجمال والحب والعدل
ياعم سيب الملك للمالك...ياريت كل يوم انتخابات.
عادل...خساره...خساره يااهل الحاره...يشتروكم بكيلوا
لحمه وبرشامه.
حنكش....وحياتك وبربع كيلوا حنقول...الجوع وحش
يااستاذ عادل.
عادل....وفين احنا كبني ادمين..فين الحريه..فين العداله.
جعلص..ياحبيبي عدلي ايه اللي بتقول عليه...لقمة العيش مره
يااستاذ واحنا ميتين وهما عرفوا يموتونا...واللي يدور
ع الحريه...لازم يكون صاحي وعمر الحريه مايجيبها
ميت.
عادل...مش صحيح كلامك الرجوله بتتخلق من رحم المعاناه
واسلوبك ده اسلوب الضعيف المستسلم..انت بتقول انك
ميت يعني عايش ميت..ليه ماتحاولش تحيا.
جعلص...اللي بيحاول يحيا في البلد دي..بيدخلوه الانعاش
بيوقفوله عقله وقلبه ويصموله ودانه ويعموا عينه
ويعيش اعمي واخرس واطرش.
فوزي....معاك حق ياجعلص...منا بدور ع الحريه ومراتي
كاتمه نفسي..اجيب منين الحريه..لا قسم ناصفني
ولا نيابه جايبه حقي...اروح لمين...فوضت امري لله.
عادل...عشان انت ضعيف...النيابه حتعملك ايه..؟..مراتك
واللي شبها جزء من النظام.
فوزي...النيابه بتقولي لازم حالة تلبس..ومين بقي اللي
يقدر يمسكها...اهل الحاره اللي بيخافوا منها ولا
القسم اللي مشغلها مرشده...ولا البلطجيه صحابها
اللي شبعوني ضرب.
عادل ...هانت ياعم فوزي الثوره حتقوم...؟
جعلص ...ثوره....ثورة ايه..؟
عادل...ثورة الحريه....ثورة التحرير.
حنكش....ياعم فوكك هو فيه حد يقدر يتنفس في البلد دي..؟
عادل....خلاص ياحنكش...الكلام ده كان زمان..الشباب بتاعنا
فتح وبقي عنده وعي.
جعلص....شباب مين ياعم اللي قاعدين ليل نهار في اسمه
ايه ده..؟
عادل ...قاعدين في النت.
حنكش...بقي شوية الخنافس دول حيقوموا بثوره..ياعم ارحمنا
دا عسكري واحد لو نفخ فيهم يجريهم...دول بسكوت
لو حطيتهم في كوباية شاي يدوبوا.
جعلص...معاك حق ياواد ياحنكش...وبعدين هي ناقصاهم.
عادل...مش يمكن ربنا يوضع سره في اضعف خلقه.
فوزي....والشباب دول امتي حيعملوا الثوره دي يااستاذ عادل.
عادل....هما بيجمعوا نفسيهم ع الفيس بوك.
جعلص..(يضحك)...وايه البوك ده محطة مترو جديده.
عادل...لا...الفيس بوك اده للتواصل الاجتماعي ع النت مع كل
العالم.
جعلص...وحيقوموا بالثوره وهما بيلعبوا ع البتاع ده.
عادل...اه...
جعلص ...دي ثورة اتاري بقي.
حنكش....اه ثورة عيال بقي.
عادل...لا دول مش عيال...دول شباب وشباب مثقف ومتعلم.
جعلص...ويعملوا ثوره ازاي ع البتاع ده....حيجمعوا نفسيهم
ع القهاوي.
حنكش....اه ويعملوا ثورة بلفتيشن.
عادل ....اسمها بليستيشن...وهما مش حيعملوا ثوره في كافيهات
النت.....هما حيجمعوا نفسيهم ويروحوا ميدان التحرير.
فوزي....حيروحوا ميدان التحرير...؟..بجد..
عادل....اه
فوزي.....انا معاكم يااستاذ عادل...مش حلاقي نومه.
عادل....اه فيه اعتصام مفتوح..
جعلص....يعني العدد حيبقي كبير.
عادل...طبعا...حيعدي المليون.
جعلص....بص يااستاذ عادل...انا لو لقيت الجو هادي
حاجي معاكم.
حنكش...(هامسالجعلص)....تروح فين ياجعلص...؟
جعلص...(هامسا لحنكش)...حروح القط رزقي ياعبيط
(محدثا عادل)..لكن لو لقيت الجو مولع نار..انت شايف
صحتي علي قدي ومش حمل بهدله.
حنكش...(هامسا لجعلص)....هي المسأله ممكن يكون فيها
لقمة عيش.
جعلص...اه ..اكيد..مش ثوره...ممكن تعملك برنيكة شاي
وعربية كبده...هيصه بقي ياواد.
عادل...(ساخرا)...حتي الثوره عاوزين تقلبوا فيها....؟
جعلص...مش بتقول ثوره معموله عشانا.
عادل....عشان كل الناس...عشان الحريه..عشان العداله...نقول
بصوت عالي للظلم لا....للفساد لا...
حنكش...طيب طالما عشان مصلحتنا انت زعلان ليه.
عادل...احنا عاوزينكم معانا ايدكم في ايدينا...مش تستغلونا
عاوزين نرجع نلاقي بعض...احنا تهنا عن بعض سنين
عاوزين نلاقي بعض مره صح...نقف ايد في ايد
نبني بلد جديد.
فوزي....انا معاكم يااستاذ عادل..يمكن الثوره تريحني من
روايح..
جعلص...واحنا برضه معاكم (هامسا لجعلص)...احنا نعدي اول
يوم والتاني...ولو لقينا الجو هادي نروحوا نلقطوا.
حنكش....ماشي ياجعلص....
(عرض فيديوهات لايام الثوره الاولي وبعد انتهاء العرض ستار)
بلاك اوت
» تطبيق وصفات طبخ
» تفسير الاحلام كاملا بالحروف
» تطبيق وصفات طبيعية للتجميل
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية