اللوحه الأخيره
الخلفيه حائط فيس بوك بلونه الازرق...صالون كبير...تجلس مايسه
المذيعه في المنتصف علي فوتيه كبير..الي اليمين منها يجلس عباطه
علي فوتيه ...كنبتان متقابلتان يجلس في كل كنبه اتنان من الشباب.
مايسه....مساء الخير عليكم ويسعدنا ان نقدم لكم اولي حلقات برنامجنا
فيس بوك...والحلقه الاولي بعنوان بنحلم بأيه...ويسعدني ان
ارحب بالنجم الكبير عباطه.
عباطه ..(معترضا)...لا محمود خير الله.
مايسه..(تبتسم)..اسفه استاذ محمود...بنرحب بالاستاذ محمود خير الله
ويسعدنا ان نقدم لكم مجموعه من شباب الفيس بوك...نبدأ من اليمين.
الاستاذ.
عمرو....عمرو شبانه محامي .
مايسه...والاستاذ..(محدثه من بجوار عمرو).
مينا.....مينا اندراوس....مهندس.
مايسه..(منتقله الي اليسار)...والاستاذ.
فهمي....فهمي عوض مدرس.
مايسه... واخيرا الاستاذ.
رمزي مهني...صحفي.
مايسه....اهلا ومرحب بيكم في اولي حلقات فيس بوك
في الحقيقه كلنا اكيد بنحلم حلم جميل لبلدنا
ياريت كل واحد فيكم يقولنا في دقيقه بيحلم بأيه
لمصر.
عباطه....انا حلمي امنيه...باتمني كل واحد فينا يكون فهم واتعلم
من الثوره...اتمني المليارات اللي كانت بتتصرف ع
الفساد واستعباد البشر تتصرف صح في تعمير البلد
مايسه....والاستاذ عمرو بيحلم بايه.
عمروي...بصفتي راجل قانون...انا بحلم بالعداله..العداله المطلقه
عداله مابتفرقش بين كبير وصغير..بحلم بعداله ماتكنش
لمصلحة فرد ولا لمصلحة طايفه ولا طبقه تعلو علي
طبقه تانيه..عداله مافيهاش فرد ياخد حق جماعه
ولا جماعه تاخد حق فرد..بحلم بعداله الكل فيها واحد.
مايسه....والاستاذ مينا ياتري حلمك ايه...؟
مينا...انا نفسي كل واحد يعرف انه مش ملك نفسه وبس
ولا ملك لطايف او جماعه...لازم كل واحد يعرف
انه ملك وطنه..انا مسيحي الديانه والمسيحيه عقيدتي
ومش عيب اكون مسلم الهويه...ليه بنتعصب...جدنا
واحد قبطي الديانه...واحفاده من جزوره اسلموا
واحفاد ظوا علي عقيدتهم..يعني بالبلدي احنا اخوه
في الدم..جزورنا واحده..وبيجمعنا وطن واحد
بنتنفس هواه وبنعيش تحت ارضه وسماه...وبيروينا
نيل واحد...عشان احنا في الاصل واحد....ليه بنتغرب عن
بعض...ليه يكون انتمائنا لحزب او تيار او طائفه علي حساب
بلدنا....بحلم بايد المسلم والمسيحي تفضل واحده ..عشان
طول عمرها واحده...
مايسه...معاك حق يامينا ....والاستاذ فهمي عوض..بيحلم بأيه.
فهمي....في الحقيقه انا بقيت اكره كلمة سياسه وكلمة ديمقراطيه.
احنا تهنا مع كلام ومصطلحات بتودي وتجيب فينا وزي
ما قال الاستاذ عمرو اننا بنحلم بعداله...العداله في حد
ذاتها حتصلح كل حاجه...حتدينا حريه صح...حتدينا
الامان والسعاده....الديمقاطيه مبدأ مش نظام والسياسه توفيق
بين المصالح علي اسس انسانيه ومش منهج...
مايسه....والاستاذ رمزي مهني...بيحلم بأيه...؟
رمزي....بحلم بحريه حقيقيه وكرامه انسانيه..مانخونش بعض
نرجع نثق ونحب بعض ونحترم بعض..ليه كل واحد
بيفكر في نفسه ويفتكر انه هو بس الصح..ليه كل جماعه
بتفكر انها بتفهم اكتر من غيرها...ليه نعتنق مبدأ المؤامرات
ونخون بعض مع اننا المفروض مصلحتنا واحده
وطريقنا واحد.
مايسه....جميل قوي اننا نحلم وجميل قوي اننا نتكلم كلام حلو
لكن ازاي احلامنا تبقي واقع...؟
عباطه....عشان احلامنا تبقي واقع لازم نعرف الحقيقه
اللي كلنا بنهرب منها...عشان كده كلنا بنخبط في
بعض وبننطح في بعض...احنا حكمنا علي انفسنا
اننا نكون خرجت لحلبه تنطح في بعض...ماقدرناش
نفهم ان عقولنا اتحررت ولازم تنطلق وتبني...لازم
نعرف الحقيقه الصعبه.
مايسه...حقيقية ايه يااستاذ محمود...؟
عباطه....حقيقة اننا عباطه...مش انا بس اللي كنت عباطه
احنا اختزلنا مصيبتنا وعيوبنا في النظام وبس
وادي النظام وقع وفلوله برضه حتقع...لكن هل
هل الفساده فيهم هما بس...الفساد سوس ونخر في
عضمنا...شوفوا حياتنا واخلاقيتنا ..ايه اللي جد
فيها بعد الثوره...حنلاقي مافيش والنتيجه صفر.
مينا...انا اتفق مع كلام الاستاذ محمود..سلوكياتنا مااتحسنتش
ويمكن تكون زادت واللي ينتقدها يظلم الثوره ويقول
ادي اللي اخدناه من الثوره...وكنا الاول احسن
البلطجه زادت...اللي راكب عربيه مابيحترمش
اشارات المرور..يمشي عكس الاتجاه..يقف في
الممنوع.
رمزي...والشوارع امتلكناها...فرشناها سوق وغير القمامه
ومافيناش حد مابيتظاهرش..اللي عاوز مرتبه يزيد
طيب من فين والاقتصاد واقع..واللي عاوز شقه
كل واحد فينا نازل عاوز حاجه...طيب من فين
اذا كانت البلد مفلسه...يعني صبرنا تلاتين سنه
ومش قادرين حتي نصبر سنه.
فهمي...باختصار..اقتلعنا نظام فاسد ..طيب مين يقتلع
فسادنا.
عباطه...ده اللي كنت عاوز اوصله.
مايسه...افهم من كده اننا محتاجين ثوره تانيه.
عمرو...طبعا...ثوره تكمل الثوره الاولي...ثورة ضمير
ثورة اخلاق...محتاجين نبطل انانيه وننكر ذاتنا
ونرجع نحب بعض.
مايسه..(محدثه الجمهور)..اي حد يحب يشارك في الحوار
حنتلقي المشاركه علي الصفحه الرئيسيه للبرنامج
علي الفيس بوك.
(يمكن تلقي مشاركات فعليه مباشره علي الخشبه ونقلها
للجمهور وتكون المشاركه لمدة ربع ساعه ومع ابطال
العرض )
مايسه..(تستكمل بعد مشاركة الفيس الحقيقيه)..(محدثه عمرو)
طيب يااستاذ عمرو انتوا ع الفيس بوك قدرتوا توحدوا
وتتجمعوا وتقوموا بثوره...تقدروا تعملوا كده تاني وتتوحدوا
وتعملوا ثورة ضمير .
عمروا....والله مش عارف اقولك ايه..؟...الثوره دي معجزه وهديه
ربانيه من خالقنا...عشان نغيروا نفوسنا...لكن مش عارف
اقولك ايه ونتجمع ازاي..؟
مينا...انا بتفق مع الاستاذ عمرو...حتي في الفيس فيه الأنا
وكل واحد عامل مجموعه...يعني تلاقي مية مجموعه
بتحلم احلام لمصر...لكن كل واحد عايش مع نفسه
واستحاله يفكروا يكونوا مجموعه واحده في جروب
واحد...ونفس الحال في جروبات دينيه او ثقافيه
او رياضيه او فنيه.
مايسه....يعني حتي في الفيس مختلفين...طب ازاي نفعل
ثورة ضمير علي ارض الواقع..
عباطه...عشان نفعل ثورة ضمير يبقي اول نقضي ع التعصب
التعصب شوكه كبيره جوانا ولازم نشيلها..عندنا تعصب
عقائدي اعمي وعندنا تعصب طائفي وتعصب حزبي
وتعصب رياضي وحتي الفكر فيه تعصب..
رمزي...معاك حق يااستاذ عباطه...لازم نقضي ع التعصب
عشان نبدأ بثورة ضمير...والاعلام عليه دور
كبير وعشان يقوم بدوره لازم هو كمان ينضف.
عمرو ...يبقي لازم نبدأ من هنا...لازم نوجه رسايل
للجميع...احنا هنا اطياف مختلفه...لكن بنغلب
الصالح العام.
فهمي...يبقي لازم نواجه اي عنصر فاسد بينا ونزيله.
عباطه...كل واحد فينا له دور...عشان يحاسب نفسه
ويرجع لبيته وجاره ويجع صح لصحابه..يرجع
لبلده اللي متغرب جواها...البلد مش حتتبني
بالشعارات ولا الاغاني ...والكلام مافيش اسهل
منه...لازم بجد نبدأ نحاسب نفسينا ولكل واحد
قبل ماينام يحاسب نفسه علي يومه...عاوزين
نبدأ نبني اول طوبه صح.
عمرو...نطرد الشيطان اللي احتلنا بجيوشه...احتل
عنينا اللي بقت تشوف الغلط وتسكت.
مينا...واحتل ودانا...وبقينا مانسمعش غير لاهوائنا.
فهمي...واحتل لسانا...وبقينا نشكك في بعض ونخون
بعض ونتكلم من غير مانفعل.
رمزي...واحتل الشيطان بجنوده بطونا واتلهينا
ازاي نملاها .
مايسه ...واحتل قلوبنا وملك النفس السيئه عليها.
عباطه...تعالوا نصحي ونفوق ونطرد الشيطان
وجنوده من جوانا...نعلي كلمة الحق
نعلي راية العداله...نقوم بثورة ضمير.
(استعراض غنائي واغنيه بمضمون الحوار الاخير)
بلاااااااااااااااااك اوت
» تطبيق وصفات طبخ
» تفسير الاحلام كاملا بالحروف
» تطبيق وصفات طبيعية للتجميل
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية