اللوحه الأولي
حجرة صالون داخل شقة الاستاذ كمال ابو المعاطي
اثاث متناثر في انتظام...في الوسط كنبة انتريه كبيره كلاسيكيه
علي جانبي الكنبه اتنين كرسي فوتيه ...سجاده النيقه في الوسط تعلوها
مائده صغيره...مناظر طبيعيه تكسوا الجدران...اضاءه متوسطه
( تفتح الستار علي الاستاذ كمال وهو يدخل علي خشبة المسرح
وخلفه زوجته عصمت الصحفيه)
عصمت ياحبيبي اديني من وقتك نص ساعه بس
أنا مش طالبه اكتر من كده.
كمال ياحبيبتي عندي مواعيد في المكتب..ماأقدرش أتاخر...
عصمت عشان خاطري دي نص ساعه وبس وبعدين
ده موضوع انساني...(متعطفه) انت مابتعملش حاجه
لله ابدا..؟
كمال دي مشكلة صاحبتك وجوزها وجايه تشكيلك انا مالي..؟
عصمت مش يمكن تكون محتاجالك ترفع لها قضيه ولا حاجه
انت ما سمعتش هي بتتكلم في التليفون ازاي...دي
منهاره خالص وبتقول انا وعيالي بقينا في الشارع
كمال ليه بيتهم وقع....؟
عصمت.... لا جوزها قليل الاصل ولافت عليه واحده واتجوزها
عرفي وخلصت علي كل اللي حيلته..واهمل عياله
حتي المصروف مابيسيبوش وياريت علي كده وبس
كمال فيه أيه تاني...؟
عصمت قعد يلف ويدور عليها لحد مابيعها الشقه
اللي كانوا قاعدين فيها ووعدها انه حيجيب
مكانها في خمس شهور وسكنها في شقه مفروشه
وطبعا مر سنه ولا جاب شقه ولا بيدفع ايجار
الشقه المفروشه وصاحب الشقه المفروشه
طردها هي وابنها.
كمال تستاهل وهي توافق ليه علي بيع شقتها.
عصمت عليه ديون كتيره وكان حيتحبس.
كمال ماتسيبه يتحبس ولا يروح في ستين داهيه.
عصمت عشان هي اصيله وعملت بأصلها معاه
(جرس الباب يدق ) ...اهي وصلت ياريت
ياكمال تكون لطيف معاها.
(تتجه عصمت لتفتح الباب وتدخل صباح وابنها يوسف
طفل في الحادية عشر من عمره)
عصمت...(ترحب بصباح) اهلا صباح (تحتضن صباح وتقبلهاوترحب بيوسف
ازيك يايوسف.
يوسف ازيك ياتانت...
صباح معلش انا جيت في وقت غير مناسب.
عصمت ماتقوليش كده ياحبيبتي ...البيت بيتك اتفضلي
(يتجهون نحو الصالون ويقف كمال مرحبا)
كمال اهلا مدام صباح ...اتفضلي
(تجلس صباح علي الكنبه وبجوارها يوسف)
عصمت قوليلي بقي ايه اللي حصل وكمال اخوكي ومش عريب
انا أخرته عن مكتبه عشانك.
صباح صاحب الشقه طردني منها وهو معذور له اكتر من خمس
شهور متأخرين غير الشهر اللي احنا فيه والبيه جوزي
من وقت مادفع اخر شهر من خمس شهور لا حس ولا خبر
حتي الشقه اللي كان فيها مع الهانم مقفوله ومش عارفين
عنه حاجه وتليفونه مقفول وخارج الخدمه.
كمال انت غلطتي يامدام صباح لما فرطتي في شقتك اللي باعها
صباح وعدني انه حيرجع لبيته وابنه وانه حيسيب الهانم اللي من
وقت ماعرفها وهو عمال يرجع ورا...كان بيلعب بالفلوس
لعبومستور ...ودلوقت راحت صحته وكترت ديونه وكان
حيتحبس وطبعا ماهنش عليا وقلت ابو ابني ودموعه غاليه
عليا اللي انخدعت بيها وقلت رجع لعقله ولازم اكون جنبه
وادي نتيجة وقفتي وعملي بأصلي معاه (تبكي بحرقه)
عصمت اهدي ياصباح مافيش مشكله مالهاش حل (تحدث كمال)
انت ترفع لها قضية طلاق ونفقه,
كمال ممكن طبعا بس لما توصل لمكانه وعنوانه ولو عاوزه قضيه
مش حتأخر.
صباح (وهي تبكي) مش عارفه اعمل ايه ولا اروح فين
حتي الشقه بتاعت امي اخويا الكبير اخدها..ومافيش في
يوم نصفوني...لا نصفوني مع جوزي ولا لقيتهم في شده.
كمال..... انا حستأذن دلوقت عشان مواعيد المكتب ولما توصلي
يامدام صباح لعنوانه حبقي اقولك نعمل ايه.
صباح (تقف) حاضر يااستاذ كمال وانا متشكره قوي علي تعبكم معايا.
كمال ماتقوليش كده احنا اهل.(محدثا عصمت) عاوزه حاجه ياحبيبتي.
عصمت متشكره ياكمال مع السلامه.
(يخرج كمال )
صباح اتمني ما كنش تقلت عليك يااستاذه عصمت.
عصمت ماتقوليش كده ياصباح...انا ما انساش وقفتك معايا في المقال
بتاعي ولولا انك شريفه ومحترمه في وقت صعب كان زماني في
السجن ومتهمهبالبلاغ الكاذب ولكنك وقفتي جنب الحق وماخفتيش
من ريسك.
صباح عارفه مسميني ايه في الشغل.........الفقريه اللي غاويه فقر
وكلهم شمتانين فيه في الظروف اللي انا فيها.
عصمت خليك قويه زي ماانت ....الشرف كرامه.
صباح لكن عند الناس دلوقت مهانه.
عصمت انت احسن من غيرك كتير....وماتغركيش المظاهر الكدابه
دول مشوهين وماليهمش هويه...ناس عايشه زي الجاموس
بينطحوا في بعض...اقري الحوادث حتلاقي اخ بيقتل اخوه
وابن بيقتل ابوه وصاحب بيحتال علي صاحبه واللي فتحت
مطوه علي ابن عمها عشان شافها واقفه مع شاب في نص
الليل وقتل ازواج وخيانات زوجيه وانتحار واستغلال نفوذ
ورشوه وتربح.....ده للأسف الواقع....ضيعنا كل حاجه
حلوه.....احمدي ربنا انت احسن من غيرك ..كفايه انك
راضيه عن نفسك.
صباح انا راضيه بقدري ونصيبي ....لكن الحمل فوق طاقتي
ومش حمل شقه مفروشه ومرتبي يادوب يعيشنا انا
وابني نص شهر وبااكمل باقي الهر من الخياطه وحامده ربنا
لكن اعمل ايه في السكن.
عصمت ماتقلقيش....انا عندي شقة امي في شارع طيبه في
الابراهيميه وشقه كبيره كمان...اقعدي فيها لحد ماتزهقي.
صباح يبقي كتر خيرك....وجميلك ده مش حنساه طول عمري
(تقترب منها لتقبل يدها فترفض عصمت)
عصمت استغفر الله....الناس لبعضيها ياصباح.
صباح....كان زمان فيه حب وكنا لبعضينا لكن دلوقت كل شئ اتغير
ربنا يسترك ويخليلك اولادك.
عصمت بس انا ليه عندك طلب صغير...؟
صباح انا تحت امرك يااستاذه عصمت.
عصمت الشقه دي كلها تحف وعفشها كله أثري..امي كانت
غاويه تحف ولوحات واثاث والحاجات دي غاليه جدا
وعشان كده انا مافرطش في حاجه مع انها تجيبلي ملايين
لكن انا الحمد لله مش محتاجه وبعدين الحاجات دي غاليه
عليه لانها من ريحة امي وصعب عليه ادخل حد شقتها
ولولا غلاوتك ماكنتش عملت كده...عاوزاك تحافظي
علي الشقه .
صباح ......في عنيه استاذه عصمت...ودي امانه واشكرك علي
ثقتك الكبيره فيه.
عصمت........انت تستحقي كل خير ..حقوم اغير هدومي وانزل
معاك افتحلك الشقه وانت النهارده اتسلي في
نضافتها وبكره هاتي حاجتك واتكلي علي الله
واقعدي فيها انت وابنك.
بلاك اوت
» تطبيق وصفات طبخ
» تفسير الاحلام كاملا بالحروف
» تطبيق وصفات طبيعية للتجميل
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية
» الاتجاهات الحديثة في الكتابة القانونية