امرأة عصرية للشاعرة / أمل صيدم

ما أنيش إنسانة سطحية
وشايفة الكون برجعية
أنا بني آدمة مخي كبير
وعايشة حياتي حرية
بقدر يعني كل الناس
وأشوف الكل شخصية
بنظرة واحدة وبإحساس
أفرق بين قزاز أو ماس
لكن عمري مابصيت لك
يا ابن آدم بدونية
صحيح بحط بينا خطوط
وارسم لك معاية حدود
تعديها تشوف الموت
خطوطي لونها وردية
لكن لو يوم حتمسحها
تلاقي السم تحتية
ولا عمري حاولت في يوم
أحارب أي إنسية
لأن الحرب تقتل كون
وده التفكير بعقلية
ودايما أكون مبتسمة
تشوفني تقول حورية
تحاول تنزع التكليف
وتعمل فيها شاب خفيف
تشوف معنى التربية
فدوغري أديك قلم تشريف
وقلمي ليك ده هدية
عشان بمجرد التفكير
في حركة تانية من ديه
حتفتكره أوام ليه
وتفهم انه فرق كبير
ما بين أدبي كشخصية
وبين قصايدي الشعرية
و تتعلم بقة يا خفيف
مفهوم المرأة العصرية

**************أميرة الحروف (امل صيدم ) **************